Ձեր վստահելի աղբյուրը

«Բուժաշխատողների շրջանում մեկնարկել է պատվաստման գործընթացը, քանի որ նրանք համարվում են առաջնագծում աշխատող անձինք»,- հրավիրված մամուլի ասուլիսում տեղեկացրեց Հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը:

Համաճարակաբանը հայտնեց, որ մնացած ռիսկային խմբերը նույնպես կամավոր սկզբունքով կենթարկվեն պատվաստման և հավելեց, որ միջազգային կազմակերպությունների հետ աշխատանքներ են տարվում նաև նրանց համար պատվաստանյութերի ձեռքբերման ուղղությամբ:

Ռոմելլա Աբովյանը  հավաստիացրեց, որ բուժաշխատողների շրջանում պատվաստումներն անցել են շատ հանգիստ՝ առանց որևէ խնդրի:

Նրա խոսքով՝ խրոնիկ հիվանդություններ ունեցող մարդիկ նույնպես  ընդգրկված են ռիսկի խմբերում և ցանկալի է նաև նրանց պատվաստումը:

«Այս պահի դրությամբ առավել շատ հիվանդանոցներ ընդունվում են ծանր կլինիկական ախտանիշներով հիվանդները, որի պատճառն այն է, որ ժամանակին չեն դիմում բժշկական օգնության, երբ ունենում են թեթև ախտանշաներ»,- նկատեց բժիշկ- համաճարակաբանը և զգուշացրեց, որ տնային պայմաններում ոչ նպատակային և ոչ ճիշտ ժամանակահատվածում, առանց բժշկի ցուցումների հակաբիոտիկների ընդունումն ավելի է բարդացնում հիվանդի վիճակը և նրանք հիվանդանոցներ են ընդունվում ծայրահեղ ծանր վիճակում:

Բժիշկը հորդորեց ախտանիշներ հայտնաբերելու դեպքում անմիջապես դիմել բժշկական կլինիկաներ, որտեղ կապահովվի նրանց բուժման կանոնակարգված ընթացքը՝ հոսպիտալացնելով կան տան պայմաններում օգնություն ցուցբերելով:

Ռոմելլա Աբողվյանը տեղեկացրեց, որ երկու շաբաթ առաջ սանիտարական կանոններում փոփոխություններ իրականացվեցին՝ դպրոցներում թույլատրելով 20-ից ավելի սաների ուսուցումը մեկ դասարանում՝ լիազոր մարմնի գրավոր համաձայնությամբ և անվտանգության կանոնների խիստ պահպանմամբ և հավելոց, որ վիճակի վատացման դեպքում այն կարող է նորից չեղարկվել:

Բժիշկը հորդորեց հետևել անվտանգության կանոնների պահպանմանը և օգտվել միայն պաշտոնական տեղեկատվությունից: