Ձեր վստահելի աղբյուրը

«Բացահայտվել է ծանրագույն հանցագործություն։ Փաստական տվյալներով բացահայտվել է, որ Փաշինյանի օգնական Աննա Վարդապետյանը ուղղակի միջամտություններ է  իրականացնում Հայաստանում արդարադատության իրականացմանը»,- ասուլիսում ասաց փաստաբան Ամրամ Մակինյանը՝ խոսելով 168.am կայքի տարածած տեսանյութի մասին, խոսքը Փաշինյանի օգնական Աննա Վարդապետյանի կողմից Ռուբեն Հայրապետյանի և նրա որդու հետ առնչվող քրեական գործի խմբագրման մասին է։

Նա նշեց, որ ձեռքի տակ ընկած փաստական տվյալներն ուղիղ ցույց են տալիս, որ Ռուբեն Հայրապետյանի և նրա որդուն վերաբերող  քրեական գործով Աննա Վարդապետյանի կողմից որպես մեղադրյալ ներգրավելու մասին որոշում է խմբագրվում։

«Համոզված եմ, որ սա միակ գործը չէ»,- ընդգծեց նա։

Ա. Մակինյանը նշեց, որ Վարդապետյանը Փաշինյանի իրավական հարցերով օգնականն է, անմիջական ենթակա է Նիկոլ Փաշինյանին, և, այս փաստերը համադրելով, իրենց մոտ, ցանկացած մարդու մոտ  չի կարող այլ ողջամիտ համոզմունք ձևավորվել, որ կոնկրետ գործերով ուղղորդումներն իրականացվում են Նիկոլ  Փաշինյանի ղեկավարությամբ։

«Բացահայտվել է  պաշտոնատար անձանց կողմից  կազմակերպված բնույթ կրող ծանրագույն հանցագործություն, մաֆիային բնորոշ դրսևորումներում են, պատվիրվում են, թե մարդկանց ինչ մեղադրանքներ առաջադրվեն։ Այն մաֆիայի մասին եմ ուզում խոսել, որի մասին, կարծես թե, անցած տարվա մարտին  Փաշինյանն էր խոսում ԱԺ-ից։ Համոզված եմ, որ կոնկրետ խոսքն ուղղված էր ինձ որպես մաֆիոզ իրավաբան։ Պարզվեց՝ ով է Հայաստանում մաֆիա ղեկավարում ու բացահայտվեց»,- ասաց Ա. Մակինյանը։  

Փաստաբան Գեորգի Մելիքյանը խոսքը  սկսեց հայտնի խոսքով վերաձևակերպված՝ «գողի ու Նիկոլի օրը 40 օր է», այսօր այդ բացահայտումներ ժամանակն է, փաստացի ականատես եղան, որ ՀՀ-ում իրականում ինչպես են իրականացվում քրեական հետապնդումներն ու որտեղից են ուղղորդվում։

«Մեղադրանքի որոշումն իրենից ներկայացնում է այն նախաքննական գաղտնիք պարունակող փաստաթուղթը, որի հեղինակային իրավունքը բացառապես քննիչինն է։ Ի՞նչ է դուրս գալիս՝ Փաշինյանի օգնականն ինքն է մեղադրանքի որոշում գրում, մեղադրանքի որոշումը վերաձևակերպում, քննիչին ցուցումներ տալիս, թե տվյալ որոշման մեջ ինչիպիսի ձևակերպումներ ներառվի։ Բացի այդ, քրեական գործում կան նախաքննական գաղտնիք պարունակող փաստաթղթեր, դրանք ևս հասանելի են դարձել Վարդապետյանին։ Պարզ է դառնում, որ  քրեական հետապնդումը ոչ թե իրականացրել է քննիչ Արթուր Այվազյանը, այլ Աննա Վարդապետյանը։ Ըստ էության, դուրս է գալիս, որ տվյալ գործով քրեական հետապնդում իրականացնողը Աննա Վարդապետյանն է, բաժնի պետը՝ Նիկոլ Փաշինյանը»,- ասաց Գ Մելիքյանը։

Ա. Մակինյանն ասաց՝ հստակ երևում է տեսանյութում, թե Աննա Վարդապետյանն ինչ է ավելացրել, փոփոխել ու մաքրել։

«Իրավունք ունեմ մտածելու, որ Վարդապետյանը կարդացել է քրեական գործն ամբողջ ծավալով, իրավունք ունեմ մտածելու, որ նա տիրապետում է այլ քրեական գործերով այլ տեղեկությունների ևս»,- ասաց փաստաբանը։

Նա ընդգծեց՝ քննիչի հետ միասին Վարդապետյանը որոշում են թե ինչ մեղադրանք առաջադրվի Ռաֆիկ Հայրապետյանին. «Այսինքն, վարչապետի օգնականն է որոշո՞ւմ, թե Հայաստանում ում, ինչ մեղադրանք առաջադրվի։

Մակինյանը նշեց, որ մի շարք հարցերի  պատասխաններ է ակնկալում Քննչական կոմիտեի ղեկավարությունից՝ ինչպե՞ս են քննիչն ու Վարդապետյանը ծանոթացել, ի՞նչ էր անում գլխավոր դատախազությունը. «Փաստորեն այս գործով հսկողությունը և դատավարական ղեկավարումն իրականացրել է Աննա  Վարդապետյանը»։

Նրա խոսքով, այս տեսանյութի հրապարարոակումից անմիջապես հետո պետք է  քրեական գործ հարուցվեր, խուզարկություններ, առգրավումներ կատարվեին քննչական կոմիտեում ու կառավարությունում։ 

Մակինյանը բացառեց անձնական մոտիվացիան, համոզված է՝ սա պայմանավորված է եղել խմբային շահով։

«Մասնավորապես, հանձնարարությունը տրվել է  Նիկոլ Փաշինյանի կողմից՝ վերահսկել այս քրեական գործով ընթացքը։ Միգուցե արդեն գրված է Ռաֆիկ Հայրապետյանի դատավճիռն է՞լ ։ Վստահ եմ, որ կա։ Հետո երևի կփոխանցեին»,- նշեց փաստաբանը։

Նա ընդգծեց՝ այս գործը բացահայտեց, որ քննչականը խելոք ենթարկվում է, դարձել է ստորագրություն դնող. «Պարզվեց՝ երեք տարի Հայաստանում նախաքննություն չի իրականացվել, նախաքննություն իրականացվել է կառավարությունում, ավելի ճիշտ՝ խմբագրվել է, ուղղարկվել քննիչների ստորագրմանը»։ 

Ինչ վերաբերում է  տեսանյութի արտահոսքին, Մակինյանն ասաց. «Բազմաթիվ վարկածներ ունեմ տեղեկատվության արտահոսքի հետ կապված։ Իսկ ի՞նչ վստահություն մենք ունենք, որ արտահոսքը նաև պայմանավորված չի եղել Աննա Վարդապետյանից հոգնելով»։ 

Փաստաբանի խոսքով, ԱԱԾ-ն պետք է իրավական գնահատականներ տա այս երկու պաշտոնատար անձանց գործողություններին, բազմակողմանի օբյեկտիվ քննությամբ հասնի նրան ու պարզի, թե կապն ով ապահովեց։ 

Մակինյանի խոսքով, Փաշինյանն էլ Հայրապետյանի գործին միջամտության գործով պետք է ներգրավվի։ 

«ԱԱԾ-ն պարտավոր է մեղադրել թե քննիչին, թե չգիտեմ՝ ում օգնականն ուզում է լինի անձը։ Պետք է Փաշինյանն էլ այս գործով ներգրավվի։ Այս ի՞նչ է կատարվում։ Մենք իրավական երկրում ենք ապրո՞ւմ, այստեղ օրենքներ կա՞ն։ Յուրաքանչյուրիս նկատմամբ կարող են քրեական գործ հարուցել և այսպես տանել առաջ։ Իսկ տանողներն այսօր պետք է պատասխան տան»,- ասաց Մակինյանը։

Ըստ նրա, առնվազն  5  դերակատար կա կոնկրետ Հայրապետյանների գործի միջամտության հարցում. «Երեքի անունը կարող եմ ասել՝  Նիկոլ Փաշինյան, Աննա Վարդապետյան, Արթուր Այվազյան, մյուս երկուսը կապող օղակներն են, պարտադիր քննչականի ղեկավար կազմից կա կապող օղակ»։

Մակինյանն ասաց, որ դիմելու է միջազգային իրավապաշտպան կառույցներին, ՀՀ-ում հավատարմագրված դեսպանություններին, ցույց է տալու, թե քաղաքական իշխանությունն ինչպես է իրականացնում իր գործառույթները։ Նա ընդգծեց՝ քրեական արդարադատությունը մի գրասենյակից է ղեկավարվում։

Փաստաբանը համոզված է, որ այսօր գործով ամեն ինչ կանխորոշված է եղել. «Սա քաղաքական հետապնդում է ուղղված ուղիղ Ռուբեն Հայրապետյանի դեմ։ Ընդհանրապես, Փաշինյանն իր հարցերը լուծում է  քրեական հետապնդումների միջոցով։ Բոլորի նկատմամբ պատվիրված քրեական հետապնդումներ են, բոլորի նկատմամբ էլ նախաքննությունը, դատաքննությունն այսպես են իրականացվել»։

Նա նշեց, որ իր համար մարտի 10-ի երեկոյից, երբ  տարածվեց տեսանյութը,  Հայաստանում ընդհանրապես արդարադատությունը մահացավ ողջ ծավալով, Հայաստանում արդարադատություն չի իրականացվում, սրա համար մարդիկ պետք է պատասխանան տան։ Ընդգծեց, որ դատարանների մասին չի խոսում։

«Բացառում եմ, որ այս գործը կոծկվի, պատասխան են տալու այս գործի համար, նաև այն մյուս գործերի համար, որոնք պատվիրել են, առաջ տարել։ Ավարտվել է այս մասով»,- ընդգծեց Ամրամ Մակինյանը։