Ձեր վստահելի աղբյուրը

ԱՄՆ նախագահ Ջո Բայդենն իր պաշտոնավարման շուրջ երկու ամիսների ընթացքում դեռ չի զանգահարել Թուրքիայի նախագահ Ռեջեփ Թայիփ Էրդողանին՝ չնայած վերջիններիս մամուլի քարտուղարները փորձում են նվազեցնել փաստի կարևորությունը։ Այս մասին գրում է Ahval News-ը։

Բայդենը կցանկանար վերակառուցել Թուրքիայի հետ կապերը և հեռացնել Միացյալ Նահանգների ՆԱՏՕ-ի դաշնակցին Ռուսաստանից, բայց լարված հարաբերությունների վերականգնումը դժվար կլինի, այս մասին գրել է AP-ն՝ հղում անելով փորձագետին։

Էրդողանի համար նաև դժվար է հետ կանգնել Թուրքիայի կողմից ռուսական արտադրության С-400 հակահրթիռային պաշտպանության համակարգերի գնման գործընթացից, որի պատճառով ԱՄՆ-ի կողմից պատժամիջոցներ է կիրառվել թուրքական պաշտպանական արդյունաբերության նկատմամբ, ասել է  վերլուծաբան Մերվե Թահիրօղլուն։ 

Այնուամենայնիվ, Թուրքիայի վերաբերմունքի արդյունքում ԱՄՆ պետքարտուղար Էնթոնի Բլինքենը երկիրն անվանեց «այսպես կոչված» ռազմավարական գործընկեր:

Բայդենը պետք է ավելի հստակ քայլեր տեսնի Թուրքիայում ժողովրդավարացման ճանապարհին՝ հարաբերությունների վերականգնումը հեշտացնելու համար, ասել է Թահիրօղլուն։

Թուրքիայի պաշտպանության նախարար Հուլուսի Աքարը կարծում է, որ Անկարայի և Վաշինգտոնի հարաբերությունները չեն կարող բարելավվել, քանի դեռ ԱՄՆ-ն չի դադարեցրել իր աջակցությունը սիրիական քրդական խմբավորումներին, որոնց Անկարան համարում է ահաբեկիչներ:

Բայդենը դեմ էր իր նախորդ Դոնալդ Թրամփի՝ Սիրիայի հյուսիսից ԱՄՆ զորքերը դուրս բերելու որոշմանը, և նրա վարչակազմը, ամենայն հավանականությամբ, ճնշում կգործադրի Թուրքիայի վրա՝ Միջերկրական ծովի արևելքում Հունաստանի հետ վեճի պատճառով:

Թուրքական կողմը ակնկալում է, որ ԱՄՆ դատարանները չեն դատապարտի պետական վարկատու Halkbank-ին, որը ներգրավված է Իրանի համար 20 միլիարդ դոլար արժողությամբ պատժամիջոցներից խուսափելու լայնածավալ սխեմայի մեջ:

Անկարան նաև ակնկալում է, որ Վաշինգտոնը հանձնելու է Ֆեթուլլահ Գյուլենին ՝ մահմեդական հոգևորականին, որն ապրում է ԱՄՆ-ում ինքնահռչակ աքսորում և որը պատասխանատու է Թուրքիայի կողմից 2016-ի հուլիսի հեղաշրջման ձախողված փորձի համար: