Ձեր վստահելի աղբյուրը

«Ես ուսումնասիրել եմ հանրային բոլոր ծառայությունները կարգավորող օրենսդրությունը, որոնցում չօգտագործված արձակուրդների համար նախատեսված է վճարում և բացասական, խտրական մոտեցում կա միայն զինծառայողների նկատմամբ, որն ամենամեծ անարդարությունն է»,- Պաշտպանության և անվտանգության հարցերի մշտական հանձնաժողովի նիստում հայտարարեց «Լուսավոր Հայաստան» խմբակցության պատգամավոր Տարոն Սիմանյանը:

Պատգամավորը ներկայացրեց խմբակցության հեղինակած «Զինվորական ծառայության և զինծառայողի կարգավիճակի մասին» օրենքում փոփոխություն և լրացում կատարելու մասին օրենքի նախագիծը, որով առաջարկվում է ծառայությունից արձակվող և զինվորական ծառայության ընթացքում չօգտագործված արձակուրդ ունեցող զինծառայողներին տալ փոխհատուցում` չօգտագործված արձակուրդների բոլոր օրերի դիմաց:

Տարոն Սիմանյանը նկատեց, որ 2018 թվականի ՍԴ որոշմամբ օրենքի գործող դրույթը համարվել է հակասահմանադրական, քանի որ նրանով նախատեսվում է փոխհատուցում տալ միայն ծառայության վերջին երկու տարիների համար, իսկ մինչև այդ չօգտագործված տարիների համար զինծառայողին փոխհատուցում չի նախատեսում, որը հակասում է հիմնական օրենսդրությանը և աշխատանքային օրենսգրքին:

Ըստ պատգամավորի, «Լուսավոր Հայաստանը» առաջարկում է անկախ զինվորական ծառայությունից արձակման տարեթվից` զինվորական ծառայության ընթացքում չօգտագործված արձակուրդ ունեցող զինծառայողներին տալ փոխհատուցում:

Տարոն Սիմոնյանը հայտնեց, որ մինչև հիմա փոխհատուցում ստանալու բազմաթիվ դատական գործեր կան, իսկ գործադիրն արդեն երեք տարի է ՍԴ-ի սահմանած այդ փոփոխությունները չի կատարել:

ՊՆ Իրավաբանական վարչության պետ Սասուն Սիմոնյանը հայտնեց, որ ՍԴ-ն այդ որոշմանը հետադարձ ուժ չի տրվել և նաև ժամկետ չի նշվել, թե երբ են փոփոխություններն իրականացվելու:

Նա նաև հայտնեց, որ դեռ 2018 թվականին շրջանառվել է համապատասխան օրենքի նախագիծ, որի համար ֆինանսական գնահատական էր պետք, ինչը ՊՆ-ն չէր կարողացել ներկայացնել և օրենքը հանվել էր շրջանառությունից:

ՊՆ փոխնախարար Արման Սարգսյանն էլ տեղեկացրեց, որ ՊՆ-ն նախատեսել է «Զինվորական ծառայության և զինծառայողի կարգավիճակի մասին» օրենքում կատարել փոփոխություններ, որում քննարկվող խնդիրը լուծվելու է համապարփակ փոփոխությունների շրջանակներում:

Նա հայտնեց, որ գործադիրն առաջարկում է չընդունել «Լուսավոր Հայաստան» խմբակցության առաջարկը և սպասել գործադիրի նախաձեռնած օրենսդրական փոփոխությանը, որի ուղղությամբ Արդարադատության նախարարությունում արդեն սկսվել է գործընթաց:

ՊՆ ներկայացուցիչ Սասուն Սիմոնյանն էլ հայտնեց, որ նախագիծը պատրաստ է, ինքը կարող է այն ուղարկել պատգամավորներին:

Հանձնաժողովի նախագահ Անդրանիկ Քոչարյանը մտահոգություն հայտնեց, որ օրենքի ընդունման դեպքում պետությունը ստիպված լինի աստխաբաշխական գումարներ վճարել շահառուներին և հետաքրքրվեց, թե համապատասխան հաշվարկներ արդյո՞ք կան:

ՊՆ ներկայացուցիչները հայտնեցին, որ նման հաշվարկներ չկան, քանի որ շատ փաստաթղթեր արխիվացվել են և թվերը պարզելու համար վարչական մեծ ռեսուրս է պետք ներդնել:

Քվեարկության արդյունքում հանձնաժողվոը մերժեց «Լուսավոր Հայաստան» խմբակցության առաջարկը: