Ձեր վստահելի աղբյուրը

«Ինչքան ուզում է դավադիր ստահակն իր արձանագրություններով, հայտարարություններով ինչ-որ բաներ ասի՝ կա օրենք, օրինականություն, որոշում՝ Օնիկ Գասպարյանը Գլխավոր շտաբի պետ է և վերջ»,- Ավան և Նոր Նորք վարչական շրջանների ընդհանուր իրավասության դատարանի դիմաց լրագրողների հետ զրույցում ասաց ՀՀԿ փոխնախագահ Արմեն Աշոտյանը:

Նա նշեց, որ կա դատական որոշում, ըստ որի կասեցվում է Օնիկ Գասպարյանի պաշտոնազրկման գործընթացը, զավեշտ է, որ առավոտյան կառավարության հերթական ուսապարկեր փորձել են մեկնաբանել, թե ինչ է ասել դատարանն ու «իրենց էշն են քշում»:

«Այս երկրում Նիկոլն ու իր ուսապարկերը, խուրջիններն այլևս էշ քշելու իրավունք չունեն, երեք տարի էշի տեղ դրեցին ժողովրդին, ցավոք սրտի նահատակելով հազարավոր անմեղ երեխաների կյանքերը, թուքերին նվիրելով հազարավոր կիլոմետրերի տարածք, չունեն այդքան խիզախություն, առնականություն, տարրական  բարոյականություն, որ նոյեմբերի 10-ին արթանացնեին Հայաստանը թեկուզ արյունաքամ, բայց ապագայի հույսով»,- ասաց Արմեն Աշոտյանը:

Նա նշեց, որ Օնիկ Գասպարյանը պետք է վերցնի Գլխավոր շտաբի ղեկավարումը:

Ա. Աշոտյանը նաև ասաց, որ Հայաստանում ռազմական դրության իմաստ չկա:

««Էկոնոմիստը» երեք ամիս առաջ գրել է, որ Հայաստանում ռազմական դրությունը պահպանվում է  բացառապես ընդդիմադիրներին ճնշելու և ընդդիմադիր  առաջնորդներին ձերբակալելու համար: Հայաստանում ռազմական դրության իմաստը ո՞րն է այս պարագայում: Օնիկ Գասպարյանը պետք է իր վրա վերցնի ԳՇ պետի պարտականություններն ամբողջությամբ, բարձրաձայնի, որ Հայաստանում  ռազմական դրության կարիք չկա: Թե չէ Նիկոլը գնում է  Մոսկվա, ասում է ՝ նոր էջ ենք բացում Ադրբեջանի հետ հարաբերություններոմ, հետո ռազմական դրություն է պահպանում: Չհասկացանք: Այսինքն, այս  տեսակի էժանագին, պրիմիտիվ, անբարո ստեր, մանիպուլյացիաներ մենք շատ ենք տեսել»,- նշեց ՀՀԿ փոխնախագահը: 

Նրա գնահատմամբ, արտահերթ ընտրությունների օրակարգն արհեստական է. «Արտահերթ ընտրությունների մասին խոսք գնալ չի կարող: Այս կեղծ օրակարգը պարզապես Նիկոլի համար դարձել է հանրային դիսկուրսում ինչ-որ արհեստական օրակարգ:

Արտահերթ ընտրությունների հիմա էլ կարող է գնալ, չի գնում, որովհետև ինքն այնքան իր ուսապարակային  պահեստի վրա, այն է ԱԺ  խմբակցության վրա, իշխանություն չունի, ուր մնաց երկրում իշխանություն ունենա:

Ակնհայտ է, որ Նիկոլն արտահերթ ընտրությունների օրակարգն  առաջ է բրդում որպես սեփական դավաճանությունը լեգիտիմացնելու, հնարավոր քվեարկողների խղճի վրա դավաճանությունը, արյունը, մահերը, սպանությունները, հայրենազրկումը, դավադրությունները թողելու համար: Եթե ընդդիմությունը բռունցք պահեց, ինչպես պահեց դեկտեմբեր-հունվարին, վստահ եմ՝  արտահերթ ընտրությունները Նիկոլի օրակարգով չեն լինելու»: