Ձեր վստահելի աղբյուրը

Հակակոռուպցիոն կոմիտեի դեպքում, որպես գործունեության երաշխիք, աշխատավարձի հավելում ստանալու հնարավորությունը և չափը սահմանված է օրենքով։  Այս մասին այսօր ԱԺ պետական- իրավական հարցերի մշտական հանձնաժողովի նիստում հայտնեց ՀՀ արդարադատության նախարար Ռուստամ Բադասյանը՝ ներկայացնելով «Հակակոռուպցիոն կոմիտեի մասին» և հարակից օրենքներում փոփոխություն կատարելու մասին օրենսդրական փաթեթը:

Նախարարը ներկայացրեց խորհրդարանում առաջին ընթերցմամբ ընդունվելուց հետո նախագծում կատարված փոփոխությունները:

Հիշեցնենք, որ ԱԺ նիստում քննարկման ժամանակ ընդդիմադիր պատգամավորները հայտարարել էին, որ Հակակոռուպցիոն կոմիտեի աշխատակիցները չպետք է ավելի վճարվեն, քան սովորական դատարանների դատավորները: Կառավարությունն էլ նոր փոփոխությամբ համաձայնել է իջեցնել պաշտոնյաների աշխատավարձերի դրույքաչափերը, բայց դրա փոխարեն, ըստ արդարադատության նախարարի, ամրագրել է աշխատավարձին հավելում տրամադրելու դրույթը:

«Ռիսկային առանձնակի բարդություններով, ինչպես նաև հատուկ մասնագիտացմամբ  պայմանավորված, տարբեր մարմիններում պաշտոններ զբաղեցնող անձինք, կառավարության թույլտվության դեպքում, բացի օրենքով սահմանված պաշտանական դրույքաչափից և հավելավճարից, կարող են ստանալ նաև հավելում»,- հայտարարեց Բադասյանը:

Նրա խոսքով՝  Հակակոռուպցիոն կոմիտեի դեպքում այն սահմանված է օրենքով, քանի որ կոմիտեի աշխատակիցների համար պարտադիր են բարեվարքության ստուգումը, լրացուցիչ մասնագիտական հմտությունների սահմանումը և օտար լեզվի տիրապետումը:

Նախարարը պնդեց, որ այս մոտեցումը հիմնավորված է նաև Վենետիկի հանձնախողովի որոշմամբ, որը, չնայած վերաբերում է հակակոռուպցիոն գործերով մասնագիտացված դատավորներին, բայց կիրառելի է նաև հակակոռուպցիոն իրավապահ մարմիններում ևս:

«Վենետիկի հանձնաժողովն իր կարծիքում նշել է, որ Հակակոռուպցիոն դատարանի դատավորները պետք է ունենան ավելի բարձր աշխատավարձի իրավունք, քան առաջին ատյանի ընդհանուր իրավասության և մասնագիտացած դատարանների դատավորները՝ հաշվի առնելով այն հանգամանքը, որ նրանք կարող են հայտնվել արտաքին զգալի ճնշումների տակ»,- նշեց Բադասյանը:

Ներկայացնելով հաջորդ փոփոխությունը՝ արդարադատության նախարարը հայտնեց, որ որոշվել է սահմանել առանձին ծառայության տեսակ, այն է՝ ծառայություն հակակոռուպցիոն կոմիտեում:

Նրա խոսքով՝ խնդիրն այն է, որ Հակակոռուպցիոն կոմիտեում  քննչական պաշտոններ զբաղեցնողները համարվելու են ինքնավար պաշտոններ զբաղեցնող, իսկ օպերատիվ հետախուզական գործունեություն իրականացնող անձանց համար առանձին ծառայության տեսակ չսահմանելը հանգեցնելու է այնպիսի իրավիճակի, որ վերջիններս չէին կարողանա ներառվել հանրային ծառայության համակարգում: 

Ըստ Բադասյանի ներկայացման՝ օպերատիվ հետախուզական ստորաբաժանման պաշտոնները համալրվելու են կոմիտեի նախագահի սահմանված կարգով և անցկացրած մրցույթների արդյունքների հիման վրա՝ հաշվի առնելով նրանց գործունեությունների առանձնահատկությունները:

Ռուստամ Բադասյանը հայտնեց, որ Հատուկ քննչական ծառայության հետ քննարկումների արդյունքում որոշվել է լուծարել այն՝ ուժը կորցրած ճանաչելով «Հատուկ քննչական ծառայության մասին» օրենքը:

«Այդ պատճառով էլ, մինչև Հակակոռուպցիոն կոմիտեի քննիչների թափուր տեղերի համալրումը, հատուկ քննչական ծառայության քննիչները ժամանակավոր կնշանակվեն կոմիտեի քննիչներ։ Նրանց թիվը 20-ն է լինելու»,- հայտնեց նախարարը:

Նա նաև տեղեկացրեց, որ նոր խմբագրմամբ, Հակակոռուպցիոն  կոմիտեի նախագահին մրցութային խորհրդի ներկայացրած երեք թեկնածուների շրջանակից կնշանակի կառավարությունը, այլ ոչ թե վարչապետը՝ ինչպես նշված էր նախնական տարբերակում:

Բադասյանը պատգամավորներին տեղեկացրեց, որ կառավարությունն ընդունել է նաև «Լուսավոր Հայաստան» խմբակցության բոլոր առաջարկները:

Հիշեցնենք, որ Հակակոռուպցիոն կոմիտեի ստեղծման պատճառն այն է, որ կոռուպցիոն հանցագործությունների քննությունը ներկայում մեկ մարմնի կողմից չի իրականացվում, այլ՝ ՀՀ քննչական կոմիտեի, ՀՀ հատուկ քննչական ծառայության, ՀՀ ազգային անվտանգության կողմից: Ըստ կառավարության՝ կոռուպցիոն հանցագործությունների քննության արդյունավետությունը կարող է երաշխավորված լինել միայն այն պարագայում, երբ այդ գործառույթը վերապահված է մեկ մասնագիտացված մարմնի՝ այդպիսով ապահովելով միասնական չափանիշներով քննության կազմակերպումը: