Ձեր վստահելի աղբյուրը

«Արտահերթ ընտրություններ անցկացնելու մեր որոշումը մնում է ուժի մեջ»,- այսօր Կառավարությունում լրագրողների հետ զրույցում ասաց ՇՄ նախարար Ռոմանոս Պետրոսյանը։

Նրա խոսքով, երկրում ծառացած քաղաքական ճգնաժամի հանգուցալուծումն իշխանությունը տեսնում է միայն արտահերթ ընտրություններ անցկացնելով, ինչը կարող է լինել մոտ ապագայում, կամ՝ միջնաժամկետ կտրվածքով։

«Մենք հակված ենք առաջնահերթ գնալու արտահերթ ընտրությունների։ 1-2 օրից ավելի հստակ կխոսենք ժամկետների մասին։ Մենք գնում ենք արտահերթ ընտրությունների, և 2 օրից կասենք՝ երբ կանցկացվեն արտահերթ ընտրությունները։ Ժամանակն է ժամկետներ նշելու, հանգուցալուծումներ գտնելու։ Այսպես թե այնպես, մեր թիմը պատրաստ է ժողովրդի առաջ ստանձնելու քաղաքական պատասխանատվություն»,- նշեց նա։

Հարցին, թե ինչպես է անցկացվելու քարոզարշավ, եթե Նիկոլ Փաշինյանը բազմաթիվ ոստիկաններով շրջապատված է շրջում, ՇՄ նախարարը պատասխանեց՝ ասելով, որ հարցն ուռճացված է։

«Երկրի ղեկավարի նկատմամբ հնչում են բռնության սպառնալիքներ, ապա պետք է նրա անվտանգությունը պահպանվի։ Նիկոլ Փաշինյանն անընդհատ ժողովրդի մեջ է, անցյալ հանգստյան օրերին եղել է Արագածոտնի մարզում, շրջել է մարդկանց մեջ»,- կարծիք հայտնեց Ռոմանոս Պետրոսյանը։