Ձեր վստահելի աղբյուրը

Այսօր իշխող «Իմ քայլը» խմբակցությունը նախաձեռնել է ԱԺ արտահերթ նիստ, որի օրակարգում ընդգրկված է մեկ հարց՝ «Հայաստանի Հանրապետության դատական օրենսգիրք» սահմանադրական օրենքում փոփոխություններ և լրացումներ կատարելու մասին նախագիծը և հարակից օրենքների փաթեթը: Օրենքը հեղինակել են «Իմ քայլը» խմբակցության պատգամավորներ Վլադիմիր Վարդանյանը, Աննա Կարապետյանը, Արթուր Դավթյանը, Վահագն Հովակիմյանը, Սերգեյ Ատոմյանը:

Նիստը մեկնարկեց 84 պատգամավորով:

Իշխող ուժն առաջարկեց հատուկ ընթացակարգով անցկացնել քննարկումը, որով նախատեսվում է երկրորդ ընթերցումը կազմակերպել առաջին ընթերցմամբ ընդունելուց հետո 24  ժամվա ընթացքում:

«Իմ քայլը» խմբակցության պատգամավոր Վլադիմիր Վարդանյանը, ներկայացնելով օրինագիծը հրատապ ռեժիմով ընդունելու անհրաժեշտությունը, շեշտեց, որ դրանով լուծվում է դատական համակարգի բարեփոխումների գործընթացի սինքրոնացման խնդիրը և հիշեցրեց, որ հաջորդ շաբաթվա հերթական նիստում քննարկվելու է Հակակոռուպցիոն կոմիտեի ստեղծման հարցը:

Հիշեցնենք, որ ՀՀ Փաստաբանների պալատը հայտարարություն էր տարածել, որում սվում էր.

«ՀՀ փաստաբանների պալատը գտնում է, որ ներկայացված նախագծերի փաթեթը անթույլատրելի է և խիստ վտանգավոր, ուղղված է դատական պաշտպանության իրավունքի սահմանափակմանը, իրավական պաշտպանության իրավունքի ոտնահարմանը, անկախ դատական համակարգի վերացմանը և այլ հակասահմանադրական և հակաժողովրդավարական նպատակների իրագործմանը:

Մասնավորապես.

-Բացակայում է նախագծի ընդունման պատշաճ հիմնավորումը: Որպես հիմնավորում է ներկայացված մեկ նախադասություն, որով ըստ էության նշված է, որ Նախագծային փաթեթի նպատակն է ապահովել գործերի դատական քննության արդյունավետ իրականացումը …: Այս մեկ նախադասությունը կրում է խիստ հռչակագրային բնույթ, չի պարունակում որևէ վերլուծություն, որևէ վիճակագրական տվյալ, որևէ երկրի օրինակ և այլն: Անգամ նախագծի հեղինակները չեն նշել, թե մասնավորապես ինչպես կարող են առաջարկվող փոփոխությունները ազդել գործերի դատական քննության արդյունավետության վրա, կամ դրանց չկատարումը որքանով է դարձնում անարդյունավետ գործերի դատական քննությունը:

-Ըստ էության դատարանին հնարավորություն է տրվում սահմանափակել փաստաբանների ելույթ ունենալու, միջնորդություն ներկայացնելու և անգամ ապացույց ներկայացնելու իրավունքը, որպիսի պարագայում փաստաբանը չի ունենալու իրավական օգնություն տրամադրելու օբյեկտիվ հնարավորություն, ինչի արդյունքում նրա մասնակցությունը դատական գործընթացներին կրելու է ձևական բնույթ, իսկ քաղաքացիներն էլ զրկվելու են իրենց սահմանադրական հիմնարար իրավունքից:

-Նշված փոփոխությունը Բարձրագույն դատական խորհրդին վերածում է դատական համակարգի վերադաս՝ 4-րդ ատյանի՝ դրանով իսկ կոպտորեն խախտելով իշխանությունների տարանջատման և անկախ դատական համակարգ ունենալու և վերջապես արդարադատության իրականացմանը որևէ միջամտություն արգելքի սահմանադրաիրավական պահանջը»: