Ձեր վստահելի աղբյուրը

«Այս նախագծի հետ կապված մասնագիտական հանրույթը բավականին լուրջ քննարկումներ արել է, և որոշակի առաջարկություններ կան, որոնք պետք է տեղ գտնեն նախագծում, բայց դուք հրատապ փաթեթ եք բերել, ուզում եք մեկ օրում ընդունել, հասարակական կարծիքը չի ամփոփվելու նախագծում»,- այսօր ԱԺ արտահերթ նիստի ընթացքում ասաց ԱԺ «Լուսավոր Հայաստան» խմբակցության պատգամավոր Տարոն Սիմոնյանն՝ անդրադառնալով իշխանության կողմից օրակարգ բերված օրենքի նախագծին։

Հիշեցնենք, որ խորհրդարանը քննարկում է «Հայաստանի Հանրապետության դատական օրենսգիրք» սահմանադրական օրենքում փոփոխություններ և լրացումներ կատարելու մասին, Հայաստանի Հանրապետության քրեական դատավարության օրենսգրքում լրացումներ կատարելու մասին և կից ներկայացված օրենքների նախագծերի փաթեթը: Նախատեսված է օրակարգային հարցի քննարկման հատուկ ընթացակարգ: Առաջին ընթերցմամբ ընդունվելուց հետո՝ 24 ժամի ընթացքում, սպասվում է նաև երկրորդ ընթերցմամբ քննարկում:

Պատգամավորը հարց հնչեցրեց, թե արդյո՞ք խորհրդարանը որոշել է, որ միայն նիստերի դահլիճում գտնվող մարդիկ պետք է մասակցեն մասնագիտական փաստաթղթերի մշակմանը.

«Բա՞ն է փոխվել քաղաքականության մեջ, գոնե առաջ մի քիչ ավելի շատ քննարկումներ էին լինում, հետո նոր գալիս էին նախագծերը»։

Պատասխանելով հարցին՝ ԱԺ պետաիրավական հարցերի մշտական հանձնաժողովի նախագահ Վլադիմիր Վարդանյանը նախ նշեց, որ հնչած հարցն իրավաչափ է։

«Ինչ վերաբերում է քննարկումներին, ապա ոչ ֆորմալ առումով քննարկումներ չեն իրականացվել, բայց առնվազն 2 շաբաթվա ընթացքում փորձել ենք այս կամ այն ճանապարհով կանոնակարգումներ անել։ Խնդրեմ, համեցեք նիստի, ներկայացրեք ձեր դիրքորոշումները։ Ես այլ ընթացակարգ չգիտեմ»,- նշեց Վլադիմիր Վարդանյանը։

Արձագանքելով՝ Տարոն Սիմոնյանն ասաց, որ ինքն իր մասնակցության մասին չի խոսում, այլ ՀԿ-ների, մասնագետների, մասնագիտական հանրույթի մասին է իր խոսքը։

«Առաջ գոնե մասնագիտական հանրույթին այս պրոցեսին ներգրավվում էին, կարծիք էին հարցնում, գոնե հարգում էին այդ կարծիքը, հիմա դուք մեկ օրվա մեջ ուզում եք օրենքի նախագիծ անցկացնել՝ առանց հարգելու մասնագիտական կարծիքը»,- նկատեց պատգամավորը։

Ի պատասխան՝ Վլադիմիր Վարդանյանը նշեց, որ ընդհանուր առմամբ, որևէ հիմք չունի վիճելու Տարոն Սիմոնյանի հետ։

«Այո՛, քննարկումներ ֆորմալ առումով չեն եղել, ոչ ֆորմալ քննարկումներ եղել են։ Ընդ որում, դուք լավ գիտեք, որ պետաիրավականի դռները միշտ բաց են, և ցանկացած հարցի վերաբերյալ ցանկացած մասնագիտական շրջանակի համար մենք հասանելի ենք։ Մենք նոր օրենսգրքի ընդունման մասին չենք խոսելու այսօր, այլ այն անհրաժեշտ փոփոխությունների մասին, որոնք հիմա ընդունելը օգտակար կլինի»,- եզրափակեց խոսքը իմքայլական պատգամավորը։