Ձեր վստահելի աղբյուրը

«Այս նախագծով դուք փորձ ենք անում ԲԴԽ-ին օժտել դատարանների ու դատավորների աշխատանքին միջամտելու լիազորություններով»,- այսօր ԱԺ արտահերթ նիստի ընթացքում ասաց ԱԺ «Լուսավոր Հայաստան» խմբակցության պատգամավոր Անի Սամսոնյանն՝ անդրադառնալով իշխանության կողմից օրակարգ բերված օրենքի նախագծին։

Նրա խոսքով, այդ լիազորությունները տրվելու են իրավական անորոշ ձևակերպումներով, ինչը հնարավորություն է տալու ԲԴԽ-ին՝ հայեցողաբար վերաբերվել դատական համակարգի աշխատանքին և դատավորների աշխատանքին։

«Հաշվի առնելով այս ամենն՝ ուզում եմ, որ անկեղծ պատասխանեք՝ այս նախագիծը շուտափույթ բերելու համար որ մեզ հավաքել եք, քաղաքական որոշում կատարելու համա՞ր է։ Վերջապես սկզիբ եք դնում դատարանների գործերին միջամտությա՞նը»,- հարց հնչեցրեց նա։

Ի պատասախան պատգամավորի հարցին՝ ԱԺ պետաիրավական հարցերի մշտական հանձնաժողովի նախագահ Վլադիմիր Վարդանյանը նշեց, որ մինչև ներկայացված փոփոխությունները կարգապահական պատասխանատվության հարց կարող էր բարձրացնել արդարադատության նախարարությունը և դատավորների ընդհանուր ժողովի կարգապահական հարցերով հանձնաժողովը։

«Մեկն, ըստ էության, կորպորատիվ շահերից ելնելով, փորձում էր ոչ բոլոր հարցերն ուղարկել ԲԴԽ, իսկ նախարարության կողմից այդ գործառույթների կիրառումը համարվում էր միջամտություն։ Հիմա առաջարկում ենք, որ քաղաքացին, ում նկատմամբ տեղի է ունեցել կարգապահական խախտում, դիմի ԲԴԽ-ին»,- ներկայացրեց պատգավորը։

Նա նկատեց, որ իրենք նախագծով ուզում են հնարավորություն տալ ԲԴԽ-ին, որ կարողանա ընդունել նորմատիվ իրավական ակտեր, որոնցով հնարավոր կլինի արդյունավետ կարգավորել այս կամ այն հարցը։

«Ի վերջո, ԲԴԽ-ն օրենսդիր կամ գործադիր մարմին չէ, այն դատական իշխանության բաղկացուցիչ մաս է»,- ասաց նա։

Արձագանքելով՝ Անի Սամսոնյանը խնդրեց հստակ պատասխանել իր հարցին. «Բերված նախագիծը մասնագիտական քննարկումների՞ արդյունք է, թե՞՝ քաղաքական որոշման։ Եթե մասնագիտական քննարկումների արդյունք է, ապա ձեր մասնագիտական մոտեցումներով դուք խաթարում եք սահմանադրության այն պահանջը, որ չպետք է միջամտել արդարադատությանը։ Եթե քաղաքական որոշում է, ապա նշանակում է՝ դուք փորձ եք անում ԲԴԽ-ի միջոցով ճնշում գործադրել դատարանների վրա, մնում է հասկանալ՝ ով է լինելու ԲԴԽ ձեր սրտի նախագահը, որ այս սև գործը կատարելու է դատարանների նկատմամբ։ Եվ ուզում եմ, որ դուք հասկանաք՝ ձեր խնդիրը դատարանների մեջ չէ, ձեր խնդիրը փնտրեք ձեր մեջ»։

Պատասխանելով՝ Վլադիմիր Վարդանյանն ասաց, որ չի հասկանում, թե ինչ խնդիրների մասին է խոսքը։ Նա խոստացավ երեկոյան մտածել, թե ինչ խնդիրներ պետք է իր մեջ գտնի։

«Բայց պետք է ասեմ, որ անկախ նրանից, թե ով է ԲԴԽ իմ սրտի նախագահը, չպետք է մոռանանք, որ ԲԴԽ-ն կոլեգիալ մարմին է։ Եթե մենք նման վերաբերմունք ունենք կոլեգիալ մարմնի նկատմամբ, ապա ոչ մի բան չենք դզելու»,- ասաց նա։

Հիշեցնենք, որ խորհրդարանը քննարկում է  «Հայաստանի Հանրապետության դատական օրենսգիրք» սահմանադրական օրենքում փոփոխություններ և լրացումներ կատարելու մասին, Հայաստանի Հանրապետության քրեական դատավարության օրենսգրքում լրացումներ կատարելու մասին և կից ներկայացված օրենքների նախագծերի փաթեթը: Նախատեսված է օրակարգային հարցի քննարկման հատուկ ընթացակարգ: Առաջին ընթերցմամբ ընդունվելուց հետո՝ 24 ժամի ընթացքում սպասվում է նաև երկրորդ ընթերցմամբ քննարկում: