Ձեր վստահելի աղբյուրը

«Կան բազմաթիվ փաստեր, որ, օրինակ, նույն Շուռնուխը, Որոտանը, Ներքին Խնձորեսկից ունենք հատվածներ, որ մեր հողերն են»,- ասուլիսում ասաց «Վերածնվող Հայաստան» կուսակցության վարչության անդամ, Գորիս համայնքի ղեկավար Առուշ Առուշանյանը։

Նա նշեց, որ ուղղակի չկա այն մարդը, ով կբանակցի ու այդ փաստերի հիման վրա իր բանակցությունը կտանի, հետևաբար թշնամին էլ օգտվել է առիթից ու իր GPS-ով  է սահման գծել, դրա համար էլ ունեն այն, ինչ ունենք։

«Եթե ունենանք նորմալ, ադեկվատ մարդիկ, ովքեր մտահոգ են մեր երկրով, բնականաբար, այդ խնդիրներն այլ հարթակներում բարձրացնելով՝ մենք կհասնենք ինչ-որ հաջողության»,- ասաց Առուշ Առուշանյանը։

Նա հայտնեց, որ այս պահին սահմանազատումը մասամբ կատարված է, բայց չի կարող ասել, որ  100 տոկոսով ավարտված է։

«Ընթացիկ խնդիրներ լինում են, թշնամու հետ նորից բանակցությունների ինչ-որ փուլ է գնում՝ այս  հատվածն իրենցն է կամ մերն է։ Գործող «իշխանությունն» առհասարակ հստակություն չի մտցրել, թե ինչ է կատարվում: Թե պատերազմի ընթացքում, թե պատերազմից հետո, թե մինչև օրս, որևէ գործողության մեջ հստակություն չկա»,- ասաց Գորիսի քաղաքապետը։ 

Ա. Առուշանյանն անդրադառնալով լուրերին, որ թշնամին Խնձորեսկում մի քանի մետր էլ է առաջ եկել թշնամին, ասաց. «Այո, այդպիսի փաստ կար. էլի GPS-ով ցույց էր տալիս, որ դա իրենց հատվածն է, նրանք էլ նորից առաջ են եկել»:

Խոսելով Շուռնուխում իրենց կորցրած գյուղացիների համար կառուցվելիք տներին, Ա. Առուշանյանն ասաց, որ այն հայտարարությունները, որ Շուռնուխում կառավարությունը որևէ գործողություններ է կատարում, կեղծիք է, միֆ,  չկա նման բան։ Նա նշեց, որ կառավարությունը դեռ նոր դիմել է  համայանքապետարան, որպեսզի հողի կատեգորիան փոխվի, որ տուն կառուցեն։ 

«Ինչ գործողություն, որ կատարվում է Շուռնուխում, մի մասը ֆինանսավորում է Զանգեզուրի պղնձամոլիբդենային կոմբինատը, մի մասը այլ բարեգործներ։ 

Այս պահին մոտ 30 տուն է կառուցվում Շուռնուխում, նաև մեր Արցախի հայության համար, ովքեր տուն չունեն, իրենց էլ է տուն տրամադրվելու»,- ասաց նա։ 

Ա. Առուշանյանը նաև նշեց, որ ներկայացնվում է՝  կառավարությունն ինչ որ գործողություն է կատարում. «Այնպիսի տպավորություն է, որ իրենց անձնական միջոցներից է, դա իմ, ձեր, բոլորիս հարկերից գոյացող բյուջեից է տրամադրվում»։