Ձեր վստահելի աղբյուրը

«Հունիսի 21-ին Նիկոլը լինելու է նախկին։  Բայց այդ նախկին-ներկա օրակարգը կեղծ է»,- «Վերածնվող Հայաստան» կուսակցության վարչության մամուլի ասուլիսի ընթացքում ասաց կուսակցության նախագահ Վահե Հակոբյանը՝ պատասխանելով հարցին, թե արդյո՞ք մտավախություն չունեն, որ իրենց անունը կկապվի «նախկինների» հետ։

Նրա խոսքով, կուսակցության անդամների մեծ մասը նախկինում եղել է «Հայաստանի Հանրապետական» կուսակցության անդամ, բայց մարդուն պետք է գործով դատել։

«Այն, ինչ այսօր Նիկոլը բղավում է, 2016 թվականից մենք արդեն կատարել էինք՝ կոռուպցիայի դեմ պայքար, ներդրումներ...։ Գնացեք Սյունիք, ցանկացած բիզնեսմենի հարցրեք, թե այն ժամանակ ոնց է եղել։ Իրենք ձեզ կտան պատասխաններ դրա վերաբերյալ։ Երբ ես դարձա Սյունիքի մարզպետ, մարզը բոլոր ցուցանիշներով վերջին տեղում էր, 1 տարի հետո մենք ցուցանիշները փակել ենք 1-ին տեղով։ Ինչ վերաբերում է ՀՀԿ-ին, ապա 2016-ից մեր բոլոր համայնքապետները մտել են այդ կուսակցություն, ինչը շատ լավ փորձ էր»,- նշեց նա։

Վահե Հակոբյանի խոսքով, երբ 2018-ին իշխանափոխություն տեղի ունեցավ, իրենք դուրս եկան ՀՀԿ-ից, որպեսզի ներդրումների վրա հարված չլինի նոր «ապաշնորհ» իշխանության կողմից։

Հարցին, թե ո՞ր ուժերի հետ կարող է համագործակցել կուսակցությունը, և որոնց հետ համագործակցությունն է բացառում, Վահե Հակոբյանը պատասխանեց՝ ասելով, որ իրենք այսօր պատրաստ են համագործակցել քաղաքական դաշտում առկա բոլոր առողջ ուժերի հետ։

«Մեզ համար կարմիր գիծը «Սասնա ծռերն» են, ինչքան ուզում է իրենք Նիկոլի դեմ պայքարեն, միևնույն է, բացառում ենք։ Իմ սուբյեկտիվ կարծիքով՝ նրանք տեռորիստ են, իրենց տեղը բերդում է»,- ասաց նա։