Ձեր վստահելի աղբյուրը

«Ստացվում է՝ բարբարոսը կացնով կանգնած մեր դռան դեմը առավոտից երեկո սպառնում է, իշխանությունն ասում է՝ ոչ, մենք պետք է գնանք դեպի բարելավման»,- ԱԺ հայտարարությունների ժամին նշեց «Բարգավաճ Հայաստան» խմբակցության քարտուղար Արման Աբովյանը:

Պատգամավորը նկատեց, որ Թուրքիան ուժեղացնում է չորրորդ դաշնային բանակը Հայաստանի սահմանից ընդամենը 15-16 կմ հեռավորության վրա, Ադրբեջանի հետ պարբերաբար իրականացնում է զորավարժություններ, վերջինիս ղեկավարը, ամեն օր սպառնում է Հայաստանին, իսկ մեր իշխանությունը խոսում է նրանց հետ դիվանագիտական հարաբերություններ հաստատելու, ճանապարհները բացելոի մասին:

Նրա կարծիքով՝ Ադրբեջանի և Թուրքիայի վարած քաղաքականությունը, միջազգային ոչ մի քաղաքակիրթ կառույցի կողմից չի կարող ընդունվել:

Պատգամավորի համոզմամբ՝ մինչև Հայաստանը դիվանագիտական, ռազմական առումով թեկուզ կիսով չափ ինքնաբավ չլինի, ճանապարհների և կոմունիկացիաների վերաբացումը բխելու է միայն Թուրքիայի և Ադրբեջանի շահերից, իսկ նրանց վերջնական նպատակը ՀՀ-ի ոչնչացումն է՝ պանթուրանական նախագծի շրջանակներում:

«Քոչվոր ցեղերը մեր տունը հայտարարում են իրենց պատմական տարածք, ոչ մի դեպքում չի կարելի թույլ տալ, որ կացնով բարբարոսը մտնի մեր տուն, իսկ կացնով բարբարոսն արդեն պատրաստվում է»,-հայտարարեց «Բարգավաճ Հայաստան» խմբակցության պատգամավորը: