Ձեր վստահելի աղբյուրը

Մարտի 22-ին Նիկոլ Փաշինյանի ստորգրած 277-Ա որոշմամբ ստեղծվել է Հայաստանի Հանրապետության պետական սահմանի ռեժիմի հարցերով միջգերատեսչական հանձնաժողով:

Որոշման մեջ ասվում է.

«Հիմք ընդունելով «Կառավարության կառուցվածքի և գործունեության մասին» Հայաստանի Հանրապետության օրենքի 7-րդ հոդվածի 16-րդ մասը՝

1. Ստեղծել Հայաստանի Հանրապետության պետական սահմանի ռեժիմի հարցերով միջգերատեսչական հանձնաժողով և հաստատել դրա կազմը՝ համաձայն հավելվածի»:

Հավելվածով սահմանված Հայաստանի Հանրապետության պետական սահմանի ռեժիմի հարցերով միջգերատեսչական հանձնաժողովի կազմում ընդգրկված են.

Ա. Թորոսյանը-ՀՀ վարչապետի աշխատակազմի ղեկավար (հանձնաժողովի
նախագահ)
Ա. Սարգսյանը-ՀՀ պաշտպանության նախարարի տեղակալ
Գ. Ղալաչյանը-ՀՀ արտաքին գործերի նախարարի տեղակալ
Ա. Սիմոնյանը-ՀՀ տարածքային կառավարման և ենթակառուցվածքների
նախարարի տեղակալ
Տ. Սիմոնյանը-ՀՀ շրջակա միջավայրի նախարարի տեղակալ
Ա. Ֆիդանյանը- ՀՀ ոստիկանության պետի տեղակալ
Գ. Հասրաթյանը-ՀՀ բնապահպանության և ընդերքի տեսչական մարմնի
ղեկավար
Ա. Մարալչյանը-Սահմանապահ զորքերի հրամանատար
Ս. Բալակինը-ՀՀ-ում ՌԴ ԴԱԾ սահմանապահ վարչության պետի առաջին
տեղակալ (համաձայնությամբ):
e-gov.am կայքում հանձնաժողովի աշխատակագը հրապարակված չէ, ինչպես սովորաբար արվում է նման որոշումների ընդունման ժամանակ: Կառավարության Տեղեկատվության և հասարակայնության հետ կապերի վարչությունից Panorama.am-ին հայտնեցին, որ որոշումը վերաբերում է պետական սահմանին, հետևաբար գաղտնի է:

«Պետական սահմանի մասին», օրենքի 8-րդ հոդվածում ամրագրված  է «Սահմանային ռեժիմ» եզրույթը.

«Պետական սահմանի ռեժիմն ընդգրկում է`

ա) պետական սահմանի խնամքի կանոնները.

բ) պետական սահմանի հատման կանոնները.

գ) անձանց, տրանսպորտային միջոցների, կենդանիների, բեռների և այլ գույքի` պետական սահմանով բացթողման կանոնները.

դ) պետական սահմանում տնտեսական գործունեություն ծավալելու կանոնները.

ե) սահմանակից պետությունների հետ սահմանային միջադեպերի լուծման կարգը»:

Վերոնշյալ մեջբերումն ամփոփ պատկերացում է տալիս հանձնաժողովի գործունեության շրջանակների մասին: Հասարակությունն այսուհետ գոնե կիմանա, թե Հայաստանի պետական ո՞ր մարմնին դիմի Ադրբեջանի կողմից միակողմանի իրականացվող սահմանազատման գործընթացի վիճահարույց հարցերով: