Ձեր վստահելի աղբյուրը

«Զոհվածների և անհայտ կորածների ընտանիքները, որոնք վարկային պարտավորություններ ունեն, որևէ աջակցություն չեն ստացել և վարկերի մարման խնդիրներ ունեն»,- խորհրդարանում հայտնեց «Իմ քայլը» խմբակցությունը լքած պատգամավոր Սոֆիա Հովսեփյանը:

Նա տեղեկացրեց, որ բանկերի հետ են այդ ընտանիքների հարաբերությունները, որտեղից նրանց հայտնում են, որ կարող են զիջումներ անել կամ վարկն ամբոջությամբ մարել, եթե զոհվածի կամ անհայտ կորածի անունով են դրանք ձևակերպված:

«Սա անհնար երևույթ է, այսինքն՝ 18 ամյա պատանուն, ով պատրաստվում էր բանակ գնալ, որևէ մեկը վարկեր չէր տա և հավանականությունը շատ փոքր է, որ որևէ ժամկետային զինծառայող կարող էր վարկ ունենալ»,- նկատեց Հովսեփյանը:

Նա դիմեց կառավարությանը՝ փոխանցելով այդ ընտանիքների խնդրանքներն ու առաջարկները, որպեսզի խնդրին ուշադրություն դարձվի և բանկերի հետ քայլեր ձեռնարկվի:

«Այն ընտանիքները, որոնք զոհված զինծառայողներ ունեն և իրենց զոհի դին դեռ չեն գտել, հազարավոր տեղեր են գնում և չեն կարողանում վարկային պարտավորությունները կատարել»,- հայտարարեց պատգամավորը և առաջարկեց կամ բանկերի հետ համաձայնությամբ վարկերի մարման ժամկետները  երկարաձգել, կամ դրանք սուբսիդավորվել, որպեսզի այդ ընտանիքները չկանգնեն ծանր խնդրի առաջ:

Սոֆիա Հովսեփյանը հույս հայտնեց, որ այդ հրատապ և կարևոր հարցն ավելի կկարևորվի կառավարության կողմից, քան ոչ առաջնահերթ օրակարգային հարցերը, որոնք պարբերաբար բներվում են ԱԺ: