Ձեր վստահելի աղբյուրը

«Կոմունիկացիաների բացման, խաղաղ համակեցության վերաբերյալ միֆերը, որոնք ստեղծվում են մեր հանրության համար, Ալիևի և Հայաստանի իշխանությունների կողմից զուգահեռ են մատուցվում»,- ասուլիսում ասաց ադրբեջանագետ Անժելա Էլիբեգովան:

Նա ընդգծեց՝ Արցախյան հարցի կարգավորման և հանգուցալուծման վերաբերյալ ադրբեջանական և հայկական պետական քարոզչությունը բացարձակ նույն թեզերով են առաջնորդվում.

«Երկուսն էլ ասում են՝ Արցախյան հարցը փակ է, եկեք ապրենք համերաշխ: Բայց այդ հարցը մեզ համար փակված չէ: Փորձել մոռացության տանել ու հանրության հիշողությունից ջնջել եղածը, ապրել Ադրբեջանի հետ նոր փոխհարաբերությունների մակարդակում, մեր հանրությունը պատրաստ չէ, քանի որ մեզ դեռ շատ հարցերի պատասխան չեն տվել: Այդ հարցերի պատասխանը չտալու համար պետք է ջնջել, փակել պատմության այդ էջը, նոր իրողության մեջ փորձել տեղավորվել:

Մեր խնդիրն է թույլ չտալ իշխանությունների դա անել, որովհետև մինչև հիմա չգիտենք ոչ զոհերի, ոչ գերիների, ոչ անհետ կորածների, ոչ վիրավորների թիվ, մեր կորուստները սկսած զինտեխնիկայից ու գույքից: Մոտավորապես պատկերացում ենք, թե ինչ ենք կորցրել, բայց հստակ որևէ մեկը  մեզ չի փորձում բացատրել, պատմել, թե ինչպես դա եղավ»:

Ադրբեջանագետի խոսքով, մաս-մաս, ուշացած են հայտնում կորուստների մասին, թաքցնում են կորուստներ, ինչը տեխնոլոգիա է ու մանիպուլյացիայի ձև:

«Եթե իրական ամբողջ պատկերը բացվի, օրինակ՝ իմանան, որ այսքան ՀԷԿ, վարելահող ենք կորցրել, ինչի հետևանքով էլեկտրաէներգիայի, հացի գինը թանկանալու է, ինչն անմիջապես անդրադառնալու է իրենց, իրենց գրպանի վրա, մարդկանց վերաբերմունքը կտրուկ փոխվելու է»,- ասաց Անժելա Էլիբեգովան:

Նա նշեց, որ Ադրբեջանի հանրային կարծիքում հայերի նկատմամբ վերաբերմունքում փոփոխություն չի եղել, հայատյացությունը շարունակվում է, հայատյացության մասով հռետորաբանությունը սրվել է:

«Ալիևն այսօր սպառնում է, վիրավորանքներ է հնչեցնում հայերի, իշխանությունների վերաբերյալ, հաջորդ օրը միջազգային հանրության համար ասուլիսի ժամանակ կարող է ասել՝ պատրաստ ենք հայերի հետ խաղաղ համակեցության, սակայն հետո հայտնաբերվեն այրված մարդկանց դիեր:

Պետք է պատրաստ լինել, որ լուրջ սադրանքներ է անելու առաջնագծում, խաղաղ բնակչության հանդեպ, անընդհատ վախի, սպառնալիքի մթնոլորտում է պահելու, որպեսզի հայաթափի այն տարածքները, որոնք չկարողացավ ստանալ: Ոչ միայ Արցախում, նաև Սյունիքում:

Հիմա մենք չենք հասկանում՝ ինչ է առհասարակ լինելու, երբ Թուրքայի ու Ադրբեջանի համար Սյունիքի տարածքով կոմունիկացիաները բացվեն: Այդտեղի հայաթափման պրոցեսը սկսվելու է, երբ որ մարդկանց ադրբեջանիցները, թուրքերը սկսեն ահաբեկել իրենց սադրանքներով, վարքագծով: Դրա դեմը պետք է առնել, սակայն դեմն առնող չկա»,- ասաց Ա. Էլիբեգովան:

Նա հավանական է համարում, որ հայկական շուկայում հայտնվի ադրբեջանական գազ ու բենզին. «Եթե գտնվեն ոչ այդքան հայրենասեր, քաղաքակիրթ մարդիկ, որոնք կփորձեն փող աշխատել այս իրավիճակում, կարող է օրերից մի օր նաև ունենանք պատկեր, որ Ադրբեջանը սկսի իր պետական նավթային կազմակերպության միջոցով նավթ ու գազ վաճառի Հայաստանին: Իսկ պետական  նավթային ընկերություն՝ նշանակում է, որ այդտեղից ֆինանսավորվում է  ադրբեջանական բանակը: Մենք գնելու ենք այդ բենզինն ու գազը, այդ գումարով գնվելու են փամփուշտներ, որոնք կրակելու են մեզ վրա»:

Անժելա Էլիբեգովան ասաց, որ Արցախի ճանաչման, անկախության ճանաչման հարցը մեզ համար պետք է լինի առաջնահերթություն, ամբողջ պետական և դիվանագտական ռեսուրսը պետք է ուղղվի Արցախի անկախության ճանաչմանը:

«Հիմա և մեր իշխանությունները, և Ալիևը փորձում են փակել այդ հարցը: Մեզ համար երբևէ փակ չպետք է լինի: Վստահ եմ, որ հիմա դա պետք է լինի մեզ համար միակ օրակարգային առաջնահերթությունը: Առանց Արցախի անկախության ճանաչման ի՞նչ ապագա է սպասվում այն տարածքին, որ մնացել է, ո՞ւմն է այն: Եթե մերն են, եկեք տեր կանգնենք եղածին, հետ բերենք այն, ինչ կորցրել ենք»,- ասաց ադրբեջանագետ Անժելա Էլիբեգովան: