Ձեր վստահելի աղբյուրը

Երևանի ընդհանուր իրավասության դատարանի Շենգավիթ նստավայրում դատավոր Աննա Դանիեբկյանի գլխավորությամբ մեկնարկեց սահմանադրական կարգի ենթադրյալ տապալման գործով հերթական նիստը։

ՀՀ նախագահի աշխատակազմի նախկին ղեկավար Արմեն Գևորգյանի փաստաբան Էրիկ Ալեքսանյանը հայտարարեց, ցանկանում է պարզաբանում, ներկայացնել, թե ինչու է բացակայել փետրվարի 23-ի նիստից։

«Անկեղծ ասած, որոշեցի ներկայացնել պարզաբանում, քանի որ չեմ ցանկանում ձեզ հաճույք պատճառել շատ արագ իմ վարքագծի մասին որոշում կայացնել»,-ասաց փաստաբանը։

Նա հիշեցրեց, որ դեռ փետրվարի 16-ի նիստում ինքը դատարանին հայտնել է, որ փետրվարի 23-ին Վերաքննիչ քրեական դատարանում նույն ժամին նիստ կա՝ իր և նույն դատավորի՝ Աննա Դանիբեկյանի վեճի շրջանակում։

«Ես միևնույն ժամանակ դատարանին խնդրեցի ըմբռնումով մոտենալ, քանի որ վերաքննիչ դատարանի դատավորի աշխատակազմից իր հետ  կապ են հաստատել ու ոչ թե  խորհրդակցել են, թե երբ նշանակեն դատական նիստը, այլ ուղղակի տեղեկացրել են, որ ամսի 23-ին արդեն իսկ նշանակված է դատական նիստ, որի վերաբերյալ կստանամ նաև գրավոր ծանուցագիր»,-ասաց Ալեքսանյանը՝ հիշեցնելով, որ դատարանին խնդրել է այս օրն ու այդ ժամին նիստ չնշանակել։

Փաստաբանի խոսքով, սակայն դատավորն անհասկանալիորեն անտեսել է իր խնդրանքը, քանի որ գործնականում բազմաթիվ են այն դեպքերը, երբ դատարանը ընդառաջ է գնում դատավարության կողմերին ու արդեն իսկ նշանակված դատական նիստերի օրերին նիստ չեն նշանակում։

«Ես վստահ եմ, որ Ձեր վարույթում քնվող գործերում ևս նման օրինակներ եղել են, վստահ եմ, որ Դուք գնացել եք ընդառաջ։ Հետևաբար հարց է առաջանում՝ ինչո՞ւ է այս քրեական գործը բացառություն, ինչո՞ւ են Արմեն  Գևորգյանն ու իր պաշտպանն անգամ այս աննշան հարցի պարագայում բացառություն։ Իմ խնդրանքն ինքնանպատակ չի եղել, ես ներկայացրել եմ համապատասխան ապացույցը»,-ասաց պաշտպանը, ընդգծելով, որ դատավորը հնարավորություն ուներ ընդառաջ գնալու, սակայն ընդառաջ չի գնացել, հակառակը հայտարարել է, որ բացակայությունը կհամարվի անհարգելի։

Ի դեպ, Ալեքսանյանը նկատեց, եթե այդ օրը Վերաքննիչ դատարանը իր օգտին որոշում կայացներ, ապա դրա արդյունքը լինելու էր դատավոր Աննա Դանիբեկյանի գործողությունների փաստի առթիվ քրեական գործի հարուցումը։

«Պարզ տրամաբանությունն էլ հուշում է, որ նման գործողությունների արդյունքում ես ձեզ ինքնաբացարկ էի հայտնելու, քանի որ նման պայմաններում դուք որպես օրինական դատարան հանդես գալ չեք կարող»,-նշեց փաստաբանը։

Ալեքսանյանը նաև ուշադրություն հրավիրեց փաստին, թե ինչպե է ստացվել, որ այդ օրը դատական նիստը չի սկսել ուղիղ ժամը 13։00-ին, զանգել են դատավորի աշխատակազմ՝ տեղեկանալու նիստ եղել, թե՞ ոչ կամ արդյո՞ք դատավարության մասնակիցը ներկայացել է նիստին, թե՞ ոչ։ Նա խնդրեց դատավորին իր պրակտիկայում գոնե մի նման դեպք հիշել, հակառակ դեպքում ինքը կարող է պնդել, որ Դանիբեկյանն այս գործի նկատմամաբ ունի առանձնահատուկ վերաբերմունք։

«Դուք այդ ինչ օպերատիվ-հետախուզական գործողություններ եք իրականացնում ինձ փնտրելու ուղղությամբ։ Փետրվարի 23-ին ժամը մեկին իմ՝ դատական նիստին չներկայանալը եղել է հարգելի։ Կրկնում եմ, դուք ունեցել եք բավարար տվյալներ դրա վերաբերյալ»,-ընդգծեց Ալեքսանյանը։

Պաշտպանն անդրադարձավ նաև նույն այդ նիստում՝ իր բացակայության պայմաններում  մեղադրող դատախազի կողմից իր վարքագծին «չարամիտ» որակում տալուն։

«Արդյո՞ք որևէ մեկը իմ բացակայության պայմաններում կարող է իմ վարքագծի վերաբերյալ տալ գնահատական։ Պարոն Բաղդասարյանը գնահատական կարող էր տալ դատական նիստին չներկայանալու պատճառների մասին պարզաբանում տալուց հետո։ Եվ առհասարակ, հարգելի դատարան, վարքագիծը լինում է կամ պատշաճ, կամ ոչ պատշաճ։ Հիմա հարց այստեղ գտնվող բոլոր իրավաբաններին, արդյո՞ք Քրեական դատավարության օրենսգիրքը նախատեսում է «չարամիտ» հասկացություն։ Ինչո՞ւ երբ պարոն Բաղդասարյանը տվեց գնահատական, այն էլ այդպիսի տերմինոլոգիայով, Դուք նրան չհորդորեցիք, որպեսզի նա օգտագործի այնպիսի տերմիններ, որոնք Քրեական դատավարության օրենսգրքով նախատեսված են»,-ասաց Ալեքսանյանը։