Ձեր վստահելի աղբյուրը

«Քանի որ ռեկտորներն անհամաձայնություն ունեն այս օրենքի կոնկրետ դրույթի վերաբերյալ, այդ դեպքում առանց կոնսենսուսի ինչպե՞ս եք պատկերացնում Ձեր հետագա համատեղ աշխատանքի շարունակությունը ԲՈւՀ-երի հետ»,- խորհրդարանում «Բարձրագույն կրթության և գիտության մասին» օրենքի նախագծի քննարկման ժամանակ ԿԳՄՍ նախարարին դիմեց «Իմ քայլը» խմբակցությունը լքած պատգամավոր Թագուհի Թովմասյանը:

ԿԳՄՍ նախարար Վահրամ Դումանյանը մինչ այդ իր ելույթում հայտարարեց, որ ռեկտորների հետ ԱԺ-ում կազմակերպված վերջին քննարկման ժամանակ համաձայնության են եկել օրենքի նախագծի շուրջ:

Թագուհի Թովմասյանն անդրադառնալով նախարարի այդ հայտարարությանը՝ չհամաձայնեց նրա հետ և ընթերցեց օրենքի նախագծի վերաբերյալ Ռեկտորների խորհրդի կարծիքից մի հատված:

Ըստ Ռեկտորների  խորհրդի եզրակացության՝ ԲՈւՀ-ի կառավարման խորհրդի ձևավորման դրույթը հակասում է բուհական ինքնավարության սկզբունքին և Սահմանադրության 38-րդ հոդվածին 3-րդ մասին, որով սահմանվում է, որ բարձրագույն կրթության մարմիններն ունեն ինքնակառավարման իրավունք և ակադեմիական ազատություն:

Թովմասյանը նշեց, որ ռեկտորները նաև հայտարարել են, որ ինքնավարությունն ամրագրված է Բոլոնիայի հռչակագրում, մինչդեռ ԲՈւՀ-ի կառավարման խորհրդի 9 անդամից 5-ին գործադիր իշխանության կողմից նշանակման դրույթը հակասում է ինքնավարության սկզբունքին:

ԿԳՄՍ նախարար Վահրամ Դումանյանը հայտնեց, որ շատ լավ, առողջ և աշխատանքային մթնոլորտում է պատկերացնում իր համատեղ աշխատանքը ԲՈւՀ-երի հետ:

Նախարարն ափսոսանք հայտնեց, որ պատգամավորը ներկա չի եղել ռեկտորների հետ ԱԺ-ում կազմակերպված հանդիպմանը, որտեղ ընթացել է ամենաբովանդակային քննարկումը, և անդրադարձ է եղել օրենքի բովադակությանը, այլ ոչ թե ռեկտորների նշանակմանը:

Հայտարարելով, որ ռեկտորները միանշանակ հավաքական կարծիք չունեն, և նախագծով ինքնավարության սկզբունքը չի խախտվում, Վահրամ Դումանյանը հայտարարեց. ««Բուհական ինքանավարություն» և «Ակադեմիական ազատություն»  երկու արտահայտություններն ունեն բարեհնչեղություն, որը շատ կարևոր է  ԲՈւՀ-երի համար, բայց այն ռեկտոր նշանակել-ազատելը չէ, այլ՝ տվյալ բԲՈւՀ-ի կանոնադրության շրջանակներում որակյալ կրթություն ապահովելը»:

Հակադարձելով նախարարի պնդմանը, թե ԲՈՒՀ-երի ինքնավարության սկզբունքը չի խախտվում՝ Թագուհի Թովմասյանը ընթերցեց ռեկտորների խորհրդի եզրակացության մյուս հատվածը, որում ասվում էր, որ կառավարման խորհրդի ձևավորման այս սկսզբունքն ամբողջությամբ խախտում են բուհերի ինքնակառավարման սկզբունքի հիմքերը, քանի որ այն ձևավորելու և կառավարելու է ոչ թե բուհական հանրույթի, այլ պետական լիազոր մարմնի միջոցով:

Ըստ պատգամավորի ներկայացրած տեքստի՝ ԲՈւՀ-երի կառավարման խորհրդի անդամների 5/4  հարաբերակցության պայմաններում որոշումները կայացվելու են դրսից՝ բուհական հանրույթին զրկելով ԲՈւՀ-ին վերաբերող որոշումներ ընդունելու և նույնիսկ դրանց վրա ներազդելու հնարարվորությունից և այն լիազոր մարմնին հնարավորություն է տալիս լիարժեք վերահսկել ԲՈւՀ-ի որոշումների ընդունումը:

Ըստ Թովմասյանի՝ այդ ամենի արդյունքում ռեկտորները մտահագություն են հայտնել որ  ԲՈւՀ-երը հայտնվելու են օրվա քաղաքական իշխանության անմիջական ազդեցության ներքո և  զրկվելու են ինքնուրույն գործելու հնարավորությունից:

Վահրամ Դումանյանն էլ հակադարձեց, թե խորհրդի կազմում չեն լինելու քաղաքական մարմիններ ներկայացնող անձինք:

«Պետական լիազոր մարմինը ԲՈւՀ-ի կառավարման խորհրդի 9-ն անդամից 5-ին է նշանակում, որպեսզի վերահսկողությունը լինի պետության ձեռքում, այստեղ գաղտնիք չկա»,-հայտարարեց ԿԳՄՍ նախարարը: