Ձեր վստահելի աղբյուրը

«Քրեակատարողական հիմնարկներում գտնվող դատապարտյալների հարազատներից արդեն ստացել եմ ահազանգեր, որ դատապարտյալների հիվանդանոցի փոխտնօրեն Սմբատ Բուլղադարյանը, «Նուբարաշեն» ՔԿՀ-ից Գևորգ Վարոսյանը, այդ և «Արմավիր» ՔԿՀ-ի ռեժիմի տարբեր աշխատակիցներ հանդիպում են դատապարտյալներին և ասում՝ գիտե՞ք չէ, թե ում եք ընտրելու, նայեք հա, չընտրեցիք՝ խնդիրներ կունենաք»,-ԱԺ-ի այսօրվա նիստում ռազմական դրությունը վերացնելու մասին նախագծի քննարկման ժամանակ հայտարարեց «Բարգավաճ Հայաստան» խմբակցության պատգամավոր Նաիրա Զոհրաբյանը:

Պատգամավորն արդարադատության նախարարին խնդրեց քրեակատարողական վարչության պետի հետ ճշտի և արգելի իր ենթականերին՝ ճնշում գործադրել դատապարտյալի և կալանավորվածի կարգավիճակում գտնվող մարդկանց վրա:

Ըստ Զոհրաբյանի՝ ՔԿՀ-ի պատասխանատուները դիմում են դատապարտյալներին՝ ասելով «Գիտե՞ս չէ, թե ի՞նչ ես ասելու քո հարազատներին, այլապես կարտսեր կընկնես,  ռեժիմդ կխստացվի»:

Պատգամավորը նաև հայտնեց, որ պատահաբար բացել է ԿԸՀ-ի կայքը և պարզել, որ այնտեղից բացակայում է ընտրողների էլեկտրոնային ցուցակը, որի փոխարեն գրված է «տեխնիկական վերազինում»:

«Չէի ուզում խախտել անմեղության կանխավարկածը, չնայած իմ երկար տարիների լրագրողական և պատգամավորական գործունեության փորձը ինձ տալիս է իրավունք չհավատալու այդ կառույցի անաչառությանը»,- նկատեց Զոհրաբյանը և հռետորական հարց հնչեցրեց, թե ինչու տեխնիկական վերազինումը վերաբերում է միայն ընտրողների ցուցակների բաժնին: