Ձեր վստահելի աղբյուրը

«Ակնհայտ է, որ անցած տարին չափազանց ծանր ու ճգնաժամային էր։ Եվ իրապես տնտեսական ճգնաժամը շատ խորն է. հատկապես տուժած ճյուղերն են փոքր ու միջին բիզնեսը»,- այսօր ԱԺ-Կառավարություն հարց ու պատասխանի ընթացքում ասաց ԱԺ «Լուսավոր Հայաստան» խմբակցության պատգամավոր Արկադի Խաչատրյանը։

Նա տեղեկացրեց, որ 2020 թվականի հուլիսին Ամերիկյան համալսարանի բիզնեսի հետազոտությունների և զարգացման կենտրոնը հետազոտություններ է իրականացրել, և արդյունքում՝ հարցված ՓՄՁ-ների 95%-ը հայտնել է, որ կրել է եկամտի կորուստ, և 2020 թվականի առաջին և երկրորդ եռամսյակների արդյունքում 2019 թվականի նույն ժամանակահատվածի համեմատ ունեցել է 70% եկամտի անկում։

«Միևնույն ժամանակ արդյունքներից մեկն այն է, որ ՓՄՁ-ներն ունենալով այդ բացասական արձագանքը, միաժամանակ Կառավարության հակաճգնաժամային միջոցառումները համարել են ոչ այդքան արդյունավետ՝ճգնաժամից դուրս գալու և իրավիճակը հաղթահարելու համար։ Այստեղից և հարցս. ինչպիսի՞ թիրախային քաղաքականություն  է իրականացվում ՓՄՁ-ների ոլորտում, և ինչպիսի՞ աջակցություն կարող են ակնկալել ՓՄՁ-ներն առաջիկայում»,- հարց հնչեցրեց Արկադի Խաչատրյանը։

Ի պատասխան պատգամավորի հարցին՝ էկոնոմիկայի նախարար Վահան Քերոբյանը նշեց, որ ՓՄՁ-ներն այս պահին ՀՀ-ում գեներացնում է ՀՆԱ-ի ավելի քիչ, քան 30%-ը։

«Իհարկե, այդ վիճակագրությունը մեզ չի բավարարում, և մեր պլանների մեջ է կտրուկ աճեցնել ՓՄՁ-ների ներառականությունը և դրանց մասնակցությունը ՀՆԱ-ի չափաբաժնում։ Նախորդ երեք-չորս ամիսների ընթացքում բավականին մեծ աշխատանք է տարվել ՓՄՁ-ների խնդիրները լուծելու համար։ Այդ թվում նաև անցկացվել է ՓՄՁ-ների խորհրդի նիստ։ Այդտեղ ներկայացվել են մի շարք խնդիրներ, որոնց մի մասն արդեն լուծվել է, մյուս մասն էլ հաջորդ նիստից հետո կլուծվի»,- ներկայացրեց նա։

Նախարարը տեղեկացրեց, որ իրենք ուզում են մեծացնել նաև ՓՄՁ-ներին տրամադրվող ստարտային կապիտալը.

«Մենք ամեն ինչ անում ենք, որ ոլորտը զարգանա և իր չափաբաժինը ՀՆԱ-ի մեջ մեծացնի»։

Արձագանքելով՝ Արկադի Խարատրյանը նշեց, որ ՓՄՁ-ներն ակնկալում են կոնկրետ և շոշափելի աջակցություն, որը թույլ կտա իրենց դուրս գալ այս իրավիճակից. «Ես նշեցի, որ իրականացված աջակցության ծրագրերը գոհացնող չեն եղել»։

Պատասխանելով Վահան Քերոբյանն ասաց, որ իրենք ուշադիր հետևում են իրադարձությունների զարգացմանը։

«ԿԲ ներկայացուցիչների հետ հանդիպման ընթացքում մենք տեղեկացանք, որ մեծ բիզնեսներն այս պահին ավելի վատ վիճակում են, դրանք գտնվումեն վարկային գերծանրաբեռնված վիճակում։ Նաև կարող եմ ասել, որ 2021-ի փետրվարին աշխատաշուկայում կտրուկ ավելացել են միկրոձեռնարկությունները։ Դա ցույց է տալիս, որ ՓՄՁ-ները վերականգնման լավ փուլում են»,- շեշտեց նա։