Ձեր վստահելի աղբյուրը

Այսօր՝ Կառավարություն-ԱԺ հարց ու պատասխանի ժամանակ անկախ պատգամավոր Գոռ Գևորգյանը հետաքրքրվեց, թե ՄԻՊ գրասենյակի ֆինանսավորումն ինչո՞ւ է կրճատվել։

«Քաջ հայտնի է, որ պատերազմի ողջ ընթացքում և հետպատերազմյան շրջանում գրասենյակը կատարել է բավականին մեծ ու տեսանելի աշխատանք, և մինչ օրս էլ կատարում է։ Առհասարակ, վերջին շրջանում տպավորություն է ստեղծվում, թե որոշակի վերապահումներ կան այս կատարված աշխատանքի վերաբերյալ, մասնավորապես՝ նաև պաշտպանին Կառավարության նիստերին չհրավիրելու հարցի առնչությամբ»,- նկատեց նա։

Գոռ Գևորգյանի կարծիքով՝ ՄԻՊ-ի թե՛ ֆինանսավորումը կրճատելու հարցում, թե՛ պաշտպանին կառավարության նիստերին չհրավիրելու հարցում պետք է լինի հստակ հիմնավորում։

«Ժողովրդավարական արժեքներ դավանող երկրում այս կառույցի աշխատանքը էական է, հատկապես, երբ հաշվի ենք առնում Ադրբեջանի կողմից մշտական բնույթ կրող հակահայկական սպառնալիքները։ ՄԻՊ ֆինանսավորման հարցը ուսումնասիրության է վերցրել նաև Վենետիկի հանձնաժողովը։ Խնդրում եմ այս հարցի շուրջ փարատեք ստեղծված այն կարծիքը, որ գրասենյակի հարցում չկա որևէ վերապահում և ֆինանսավորման կրճատումն առավել քան հիմնավորված է»,- ասաց նա։

Սակայն պատամավորի հարցը մնաց անպատասխան։ Նրան առաջարկեցին գրավոր հարցում ուղարկել, որին և կպատասխանի Կառավարությունը։