Ձեր վստահելի աղբյուրը

«Պետական կառավարման մարմինների, այդ թվում կառավարական կապի, ՀՀ պաշտպանության, պետական անվտանգության և հասարակական կարգի պահպանման կարիքների համար կառավարական նշանակության հաճախականությունների սպեկտրի կառավարումն իրականացվում է կառավարության 2014 թվականի N 517-Ն որոշմամբ»,- խորհրդարնում հայտնեց ՀՀ բարձր տեխնոլոգիական արդյունաբերության(ԲՏԱ) նախարարի տեղակալ Գոռ Մելիքյանը՝ զեկուցելով «Էլեկտրոնային հաղորդակցության մասին» օրենքում փոփոխություններ և լրացումներ կատարելու մասին նախագիծը:

Ընդգծելով, որ այդ գործառույթն կարգավորվում է կառավարության «Ռադիոհաճախականության շերտերի կառավարական նշանակության սպեկտրի օգտագործման իրավասություն ունեցող սուբյեկտների ցանկը և կառավարական նշանակության սպեկտրի ռադիոհաճախականության շերտերի հատկացման կարգը հաստատելու մասին»  որոշմաբ՝ փոխնախարարը սակայն նկատեց, որ առկա չէ դրա ընդունման իրավական հիմքը, այսինքը՝ ոլորտը կարգավորող օրենքում բացակայում են համապատասխան կարգավորումները:

Մելիքյանի խոսքով՝ շահագրգիռ գերատեսչությունները քննարկել են և հարկ են համարել խնդիրը լուծել «Էլեկտրոնային հաղորդակցության մասին» օրենքում համապատասխան լրացում կատարելու միջոցով:

Գործադիրն առաջարկում է օրենքում ամրագրել «Ռադիոհաճախականություն», «Ռադիոհաճախականությունների սպեկտր», «Ռադիոհաճախականությունների տիրույթ», «Կառավարական նշանակության ռադիոհաճախականությունների սպեկտր» հասկացությունները:

Մասնավորապես նախագծով սահմանվում է, որ կառավարական նշանակության ռադիոհաճախականությունների սպեկտրը, դա ռադիոհաճախականությունների և ռադիոհաճախականությունների տիրույթների համախումբ է, որը նախատեսված է միայն պետական մարմինների, այդ թվում` կառավարական կապի, ՀՀ պաշտպանության, պետական անվտանգության և հասարակական կարգի պահպանման կարիքների համար:

Օրենքի նախագծով նաև ամրագրվում է, որ լիազոր մարմինը՝ ԲՏԱ նախարարությունը, իրականացնում է պետական մարմինների կարիքների համար կառավարական նշանակության ռադիոհաճախականությունների սպեկտրի կառավարումը:

Օրինագծով նաև ամրագրվել է, որ կառավարական նշանակության ռադիոհաճախականությունների սպեկտրի օգտագործման իրավասություն ունեցող սուբյեկտների ցանկը և կառավարական նշանակության ռադիոհաճախականությունների սպեկտրից ռադիոհաճախականությունների տիրույթների հատկացման կարգը հաստատում է կառավարությունը: