Ձեր վստահելի աղբյուրը

«17-ի ձևաչափը պահպանվելու է, և չենք դադարեցնելու բողոքի ակցիաները, դրանով էլ պայմանավորված է մարտի 28-ի հանրահավաքը, իսկ եթե հանկարծ ֆորսմաժորային իրավիճակ լինի՝ 17-ն ամբողջ թափով կգործարկվի»,-խորհրդարանում ճեպազրույցի ժամանակ հայտնեց «Բարգավաճ Հայաստան» խմբակցության պատգամավոր Միքայել Մելքումյանը:

Նրա խոսքով՝ եթե արտահերթ ընտրություններ անցկացնելու պայմանավորվածությունը չպահպանվի, այն շատ լուրջ բացասական ռեզոնանսի կհանգեցնի:

Պատգամավորն ասաց, որ չի կարող որևէ մեկի ասածի վերաբերյալ երաշխիք տալ և պնել, որ ընտրություններն անպայման տեղի կունենան, բայց ենթադրում է, որ պայմանավորվածությունները չեն խախտվի:

«Կսպասենք ապրիլի 20-ից հետո, եթե չլինի հրաժարական, ապա ժողովուդը դուրս կգա փողոց և, կարծում եմ, ոչ մի պայմանավորվածություն այլևս չի գործի»,- հայտարարեց Մելքումյանը:

Նա նաև բացառեց լրագրողի պնդումը, թե արտահերթ ընտրություններ հայտարարելով Փաշինյանը փորձում է Գագիկ Ծառուկյանին հնազանդեցնել:

«Բարգավաճ Հայաստան» խմբակցության պատգամավորի կարծիքով 3 մլրդ դամ է անհրաժեշտ ընտրությունների համար և հիշեց, որ այդ չափի գումարի մասին էին խոսում մեկ տարի առաջ սահմանադրական հանրաքվե անցկացնելու համար:

«Հարկային մուտքերն ամսական միջինը  90-110 մլրդ դրամ է, դրանից մի քանի միլիարդը տրամադրել նրան, որ նոր իշխանություն և նորմալ պետություն ունենանք՝ ինձ թվում է շատ կարևոր է», -հայտնեց Մելքումյանը և հավելեց, որ բախումներից խուսափելու ճանապարհը  միայն Սահմանադրության ուղիով ընտրության գնալն է:

Պատգամավորը տեղեկացրեց, որ Հայաստանում ամեն երկու ընտանիքից մեկը կամ մոտ 1 մլն 700 հազար մարդ վարկառու  է, իսկ վարկերի ծավալը 8 մլրդ դոլար է, այն դեպքում, երբ պետության  համախառը ներքին արդյունքը 12 մլրդ է:

«Եթե «Բարգավաճ Հայաստանը»  կուսակցությունը գա իշխանության, իսկ ես հավատում եմ, որ մենք անպայման իշխանությնուն ենք լինելու, ապա ազատագրելու ենք վարկառուների մեծ մասին»,- խոսքն ավարտեց Միքայել Մելքումյանը: