Ձեր վստահելի աղբյուրը

«Այստեղ խոսքը մինչև 1 միլիոն դրամի վարկերի սուբսիդավորման ու պրոցեսի շարունակման մասին է, որոնք կազմել են երկրորդ ծրագրի ընդհանուր վարկերի 2/3-ը, այսինքն՝ մոտ 36 հազար վարկից 26 հազարը եղել են հենց այս տիպի վարկերը, կամ ընդհանուր 63 միլիարդի 1/3-ը՝ 21 միլիարդը»,-զեկուցելով գյուղատնտեսական վարկերին վերաբերող հակաճգնաժամային երկրորդ միջոցառման ժամկետը երկարացնելու հարցը՝ կառավարության նիստում հայտնեց  էկոնոմիկայի նախարար Վահան Քերոբյանը:

Նրա խոսքով՝ այդ վարկերը փոխարինել են նախկինում կառավարության տված գյուղատնտեսական զանազան աջակցության ծրագրերին՝ պարարտանյութեր, վառելանյութ և այլ մկջոցներ տրամադրելուն:

Նախարարն առաջարկեց երկարաձգել գործիքի կիրառումը մինչև հոկտեմբերի 1-ը, մինչև կառավարությունն ամբողջությամբ վստահ կլինի, որ գյուղատնտեսությունն ու տնտեսությունը վերականգնվել են:

Տարածքային կառավարման և ենթակառուցվածքների նախարար Սուրեն Պապիկյանն էլ հավելեց, որ այդ վարկի առավելությունն այն է, որ գրավ չի պահանջվում և փոքր գյուղացիական տնտեսությունների համար է:

«Գարնանամուտին կարևոր է, որ գյուղացիները կարողանան իրենց փոքր հողատարածքի համար ձեռք բերել սերմացու, պարարտանյութ և անհրաժեշտ այլ պարագաներ»,- նկատեց Պապիկյանը: