Ձեր վստահելի աղբյուրը

Փարիզի Կլիմայական համաձայնագրի ստորագրումից հետո, հինգ տարվա ընթացքում աշխարհի խոշորագույն 60 բանկ 3,8 տրիլիոն դոլար են ներդրել վառելիքի արդյունահանման մեջ: Ինչպես գրում է «Ինտերֆաքս»-ը, այդ մասին ասվում է «Banking on Climate Chaos 2021» զեկույցում:

«J.P. Morgan Chase & Co.» բանկը դարձել է վառելիքային հանածոների արդյունահանման ֆինանսավորման առաջատարը: Ըստ մի շարք բնապահպանական կազմակերպությունների, այդ թվում՝ «Rainforest Action Network »-ի հետազոտությունների, այդ ընկերությունը հինգ տարվա ընթացքում հանքարդյունաբերության մեջ ներդրել է 313,74 միլիարդ դոլար: Նրան հաջորդում է «Citigroup Inc.»-ը (237,5 միլիարդ դոլար) և «Wells Fargo & Co.»-ը (223,35 միլիարդ դոլար):

Այնուամենայնիվ, երեք տարի անընդմեջ աճից հետո 2020 թ-ին ոլորտի բանկային ներդրումներն ընդհանուր առմամբ կրճատվել են 9%-ով: Մասնավորապես, «Wells Fargo»-ն անցյալ տարի կրճատեց ներդրումները՝ այն հասցնելով 26,4 միլիարդ դոլար՝ նախորդ տարվա 45,68 միլիարդի փոխարեն:

Դիտարկված բանկերի ցուցակում միակ բանկը, որը 2020 թվականին չի ֆինանսավորել էներգակիրների արդյունահանումը, ֆրանսիական «Credit Mutuel»-ն է: Այս բանկը ոլորտի ֆինանսավորման տեսանկյունից վերջին հորիզոնականում է՝ հինգ տարվա ընթացքում հանքարդյունահանման մեջ ներդնելով ընդամենը 284 միլիոն ԱՄՆ դոլար: