Ձեր վստահելի աղբյուրը

«Նիկոլ Փաշինյանը կարծում է, որ բոլորն անխտիր պետք է ենթարկվեն իրեն, միապետն անգամ իրեն այդպես չի պահում, քանի որ միապետերն էլ դաստիարակվում են այլ միջավայրում»,- այսօր հրավիրված մամուլի ասուլիսի ընթացքում ասաց իրավապաշտպան Լարիսա Ալավերդյանը։

Նրա խոսքով, միապետն ընդառաջ է գնում այն կարծիքներին, որոնք համապատասխանում են օրենքին, օրենսդրությանը և պետության անվտանգությանը։

«ԳՇ դեմ Փաշինյանի քայլերը պետական անվտանգության դեմ հանցագործություն է։ Առաջին անգամ նորանկախ Հայաստանում մենք ունեցանք իրավիճակ, երբ անօրինության ուժով նոր ԳՇ պետ նշանակվեց, այստեղ է իմ ավելի մեծ վրդովմունքը։ Հիմա ցանկացած ոք, այդ թվում և Արտակ Դավթյանը գիտեն, որ դա անօրինություն է։ Եվ երբ որ բոլոր դեպքերում հայկական բանակի գեներալն ընդունում է մի որոշում, որ քայքայում է պետականության հիմքերը, դրանով առաջացնում է իմ վրդովունքը»,- նշեց նա։

Լարիսա Ալավերդյանը նկատեց՝  ինքն այլևս Նիկոլ Փաշինյանի քայլերից չի զարմանում, այլ ցավ է ապրում, որ անօրինության դաշտ են մտնում նաև մարդիկ, որոնք ունեին հարգանք։

«Պետականության դեմ է հանցագործությունը։ Այն, ինչ արել է մինչ այս Արտակ Դավթյանը, համեմատության մեջ չի կարող մտնել փաստի հետ, որ նա ընդունել է Նիկոլ Փաշինյանի անօրինական առաջարկն ու դարձել է ԳՇ պետ։ Այստեղ գործում է նյուրնբերգյան դատավարության սկզբունքը, այն է՝ անօրինական հրաման իրականացնողը նույնչափ հանցագործ է»,- կարծիք հայտնեց նա։

Նրա խոսքով, այժմ պետք է ստեղծվի ազգային քաղաքացիական տրիբունալ. «Մինչև հիմա մոլորվածներ կան, իսկ եթե լինի տրիբունալ, այն պարզապես կշարադրի, կտպի այն բոլոր հանցագործությունները, որոնք իրականացրել է այս իշխանությունը, ապա նաև կներկայացնի դրանց հետևանքները»։

Իրավապաշտպանը նշեց, որ մինչ այսօր ՀՀ-ն պաշտոնական մակարդակով որևէ գնահատական չի տվել ադրբեջանական ագրեսիային, ցեղասպանական գործողություններին։

«Իսկ իմ ասած տրիբունալը, հետևելով միջազգային պրակտիկայում առկա փորձին, կարող է այդ ամենը ներկայացնել։ Այդ հայկական տրիբունալը կբացահայտի բոլոր հանցագործությունները»,- ասաց նա։

Ըստ Լարիսա Ալավերդյանի, երբ Նիկոլ Փաշինյանը ադրբեջանական պետական դրոշի օրվա կապակցությամբ նոյեմբերի 9-ին ստորագրում էր հայտարարություն՝ չսպասելով անգամ նոյեմբերի 10-ին, հատուկ պրոթուրքական քայլ էր անում։

«Պետք է հակիրճ ներկայացնել հանրությանը, թե դա ինչ մեծ հանցագործություն էր։ Երբ էլ սկսենք, կլինի ճիշտ ժամանակը։ Պետք է բոլոր զոհերի թվերն ասվի, պետք է անուն-ազգանուններով նշվի նրանց անունները։ Ես չեմ հասկանում՝ ինչու մեր իրավաբաններն այդ գաղափարը չեն իրականացնում, ինչու չեն նախաձեռնում տրիբունալի ստեղծումը»,- ասաց իրավապաշտպան Լարիսա Ալավերդյանը։