Ձեր վստահելի աղբյուրը

«ԲՀԿ-ն ունի այնքան վստահության քվե, որ երկու ընտրակարգի դեպքում էլ կարող է իր վստահությունն իրացնել ու ստանալ իր ընտրողների քվեն»,- այսօր խորհրդարանական ճեպազրույցի ընթացքում ասաց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը՝ անդրադառնալով իշխանությունների՝ համամասնական փակ ցուցակներով ընտրություններին գնալու ցանկությանը։

Հարցին, թե արդյո՞ք չկա մտավախություն, որ, այնուամենայնիվ հունիսի 20-ին ընտրություններ չեն անցկացվի, պատգամավորը պատասխանեց՝ ասելով, որ կարող է լինել նման մտավախություն՝ հաշվի առնելով Նիկոլ Փաշինյանի էմոցիոնալ տեսակը։

«Հաշվի առնելով, որ վաղը Նիկոլ Փաշինյանը կարող է իր հերթական լայվում հայտարարի,որ ընտրությունների հարյաին պահանջ չկա՝ կարող է լինել նման մտավախություն։ Եկեք համաձայնեք, որ այս տարիների ընթացքում ինքը մի քանի անգամ արել է հայտարարություններ, որոնք հետագայում հերքել է։ Մասնավորապես՝ ինքը ասել է, որ կիսանախագահական համակարգն իրեն չի արդարացնում, այնուհետև հայտարարեց, որ միգուցե անհրաժեշտություն լինի կիսանախագահական համակարգին անցնելու։ Ինքը ընտրությունների թեմային անդրադառնալով մի քանի անգամ փոխել է իմ մոտեցումը. նախ ասել է, որ գնում են ընտրությունների, հետո՝ թե չկա արտահերթ ընտրությունների վերաբերյալ հանրային պահանջ...։
Ես չեմ կարող միանշանակ պնդել, որ վաղը կամ մյուս օրը ինչ-ինչ պատճառաբանություններով, օրինակ՝ կորոնավիրուսի դեպքերի թվի աճ, սահմանային լարված վիճակ, չեն հայտարարի, որ արտահերթ ընտրություններ չեն լինելու»,- նշեց նա։

Պատգամավորը նկատեց՝ այս պահին վաղ է համամասնական ցուցակի մասին խոսելը, միայն հայտնի է, որ ցուցակը գլխավորելու է Գագիկ Ծառուկյանը։

«Քննարկումները շարունակվում են, և դեռ վերջնական որոշում չկա։ Պետական գաղտնիք չի լինելու, թե ով է գլխավորելու ԲՀԿ շտաբը։ Մեր հայրենակիցներն անպայման իմանալու են, թե ովքեր կան ցուցակներում։ Վստահ եղեք, որ ցուցակը լինելու արժանապատիվ»,- շեշտեց ԲՀԿ-ական պատգամավորը։

Նաիրա Զոհրաբյանն անդրադարձավ նաև Կառավարության երեկվա որոշմանը, որով ոստիկանների աշխատավարձը գրեթե 100%-ովբարձրանալու է։ Նա նշեց, որ դա իր մեջ հստակ մեսիջներ է պարունակում, հատկապես այս նախընտրական շրջանում։

«Ինձ թվում է, որ հստակ մեսիջ կա։ Բազմաթիվ են տեղեկությունները, որ այս ընթացքում, երբ ոստիկանները 24 ժամ զբաղված էին ընդդիմադիրներին վերահսկելով, նրանց նկատմամբ անհամաչափ ուժ կիրառելով, ստացել են նաև հավելավճարներ։ Սա միանշանակ ուղերձ է։ Այս ընթացքում, երբ մենք ահազանգ ստացանք, որ օրինակ՝ շտապ օգնության աշխատողների աշխատավարձերն ուշանում են, գնալ ոստիկանների աշխատավարձերի բարձրացմանը, հստակ ուղերձ է։ Նիկոլ Փաշինյանը փորձում է քարոզարշավին օգնող ուժային կառույցների աշխատավարձերը բարձրացնել»,- ասաց նա։

ԲՀԿ-ական պատգամավորն անդրադարձավ նաև Արցախում ռուսերենը որպես երկրորդ պետական լեզու ընդունելուն։ Նա նշեց, որ Արցախի 75%-ի կորստից հետո այսօր ՌԴ-ն համարվում է Արցախի անվտանգության երաշխավոր։

«Հաշվի առնելով բոլոր այն մարտահրավերները, որոնք կան Հայաստանի առաջ՝ թուլացած Սյունիքով, հանձնված Արցախով..., մենք կարծում ենք, որ իսկապես ժամանակն է, որ Ռուսաստանի հետ կնքվի նոր ռազմաքաղաքական դաշինք։ Մենք այդ դաշինքի դետալային մանրամասնությամբ շուտով հանդես կգանք»,- նշեց պատգամավորը։