Ձեր վստահելի աղբյուրը

«Սահմանադրական դատարանն արձանագրեց և ճանաչեց Սահմանդրությանը հակասող և անվավեր  Քրեական օրենսգրքի չարաբաստիկ 300.1 հոդվածը, Սահմանադարական դատարանն ընդգծեց Սահմանադրության 78 և 79-րդ հոդվածները՝ դրանով իսկ որոշակիության և համաչափության վերաբերյալ Սահմանադրությանը հակասող»,- ՍԴ-ի կողմից որոշման հրապարակումից հետո լրագրողներին ասաց ՀՀ երկրորդ նախագահ Ռոբերտ Քոչարյանի պաշտպաններից Արամ Վարդևանյանը։

Նա նշեց՝ ցավում է, որ այս ամենը տևեց 3 տարի, բայց ի վերջո ճշմարտությունը հաղթեց։

«2018 թվականի սեպտեմբերից մեր փաստաբանական թիմը, հենց անձամբ Ռոբերտ Քոչարյանը նշում էին 300.1-րդ հոդվածի ոչ որոշակի լինելու մասին։ Իհարկե, ափսոս, որ այս ամենը պետք է արձանագրվեր միայն 2021 թվականին։ Բայց այսօր արձանագրվեց և բարձր դատարանը գտնվեց իր բարձունքի վրա։

Սա նշանակում է, որ 300.1-րդ հոդվածով ինչպես ի սկզբանե չէր կարող լինել քրեական հետապնդում, այդպես էլ այս քրեական հետապնդումը 300.1-րդ հոդվածով դադարեցվելու է»,- ասաց Արամ Վարդևանյանը։

Սահմանադրական դատարանի որոշումը մտնում է ուժի մեջ հրապարակման պահից։ Որոշումը կհրապարակվի 3-օրյա ժամկետում։

Սույն գործով ՍԴ դատավոր Երվանդ Խունդկարյանը հատուկ կարծիք ունի որոշման պատճառաբանական մասի վերաբերյալ։

«Փաստորեն, Սահմանադրական դատարանի  այլ դատավորները հատուկ կարծիք չունեն։ Սա նշանակում է, որ Սահմանադրական դատարանը նման մեծամասնությամբ գտավ, որ այս հոդվածը հակասահմանադրական է»,- ասաց Ռ.Քոչարյանի պաշտպանը։

Արամ Վարդևանյանն ասաց, որ Եվրոպական դատարանի և Վենետիկի հանձնաժողովի խորհրդատվական կարծիքներից հետո այս ամենը, եթե լիներ արդարադատություն, ակնհայտ էր։

«Այս ընթացքում Եվրոպական դատարանին, Վենետիկի հանձնաժողովին, ՍԴ-ին մեր կողմից ներկայացվել էր 100 էջից ավելի դիմում։ Այսօր, իսկապես շատ կարևոր օր է»,- ասաց նա։

Նա նշեց, որ  Սահմանադրական կարգի ենթադրյալ տապալման գործը քննող Երևան քաղաքի ընդհանուր իրավասության դատարանի դատավոր Աննա Դանիբեկյանը քրեական հետապնդումը 300.1-րդ հոդվածով դադարեցնելու է, որովհետև ՍԴ-ի որոշման ուժով արդեն իսկ բոլոր ակտերը, որոնք վերաբերում էին 300.1-րդ հոդվածին, ընդունման պահից ի վեր ուժ չունեն և ենթակա են վերանայման՝ 2009 թվականից սկսած։

«Այստեղ դիմադրելու խնդիր չկա։ Քրեական օրենսգրքում այլևս 300.1-րդ հոդված չկա։ Եթե չկա հոդված, չկա հանցանք։ Սա Քրեական օրենսգրքի պարզ տրամաբանությունն է»,- ասաց Արամ Վարդևանյանը։

Պաշտպանն ասաց, որ առաջիկա երեքշաբթի նշանակված դատական նիստին փաստաբանական թիմով կներկայացնեն համապատասխան միջնորդությունը, բայց, ի դեպ, Քրեական դատավարության օրենսգիրքը պաշտպանական կողմի վրա նման պարտականություն պարզապես չի դնում, սա նաև մեղադրանքի կողմի պարտականությունն է.

«Կա հանգամանք, որն արդեն իսկ փաստում է, որ Քրեական օրենսգրքում 300.1-րդ հոդված  գոյություն չունի։ Այսօրվանից ի վեր 300.1-րդ Քրեական օրենսգրքում չկա»։

Այսինքն, ըստ նրա, Սահմանադրական կարգի ենթադրյալ տապալման գործով անցնող անձանց էլ է վերաբերում։

Հարցին՝ Ռոբերտ Քոչարյանը նաև կաշառք ստանալու համար է մեղադրվում, այս դեպքում ի՞նչ պետք է լինի, Արամ Վարդևանյանն ասաց. «Հիշեցնեմ, որ այդ հոդվածի վերաբերյալ նույնիսկ նախաքննական փուլում, մինչդատական վարույթում հիմնավոր կասկածը չէր հաստատվել, Վճռաբեկ դատարանն էլ հիմնավոր կասկածն այդ հոդվածով չհաստատելու մասով վարույթ չէր ընդունել, այսինքն` այդտեղ որևէ խնդիր չէր տեսել»։

Ռոբերտ Քոչարյանի պաշտպանը ևս մեկ անգամ բոլորին շնորհավորեց, որովհետև, ինչպես նշեց, այստեղ ևս մեկ հանգամանք կա. «Ի վերջո ապօրինությունը որևէ մեկի շահերից չի կարող բխել, որովհետև անարդարությունը ի վերջո, ինչպես իմաստուն խոսքը կա, ինչ որ տեղ սպառնալիք է արդարությանն առհասարակ ամենուր։ Այս անարդարությունն ավարտվեց»։