Ձեր վստահելի աղբյուրը

Գլխավոր դատախազի խորհրդական Գոռ Աբրահամյանը ֆեյսբուքյան իր էջում հրապարակել է Քրեական օրենսգրքի 300.1 հոդվածը հակասահմանադրական ու անվավեր ճանաչելու վերաբերյալ ՍԴ որոշմանը հետևած արձագանքների վերաբերյալ, ենթադրաբար արձագանքելով սահմանդրական կարգի ենթադրյալ տապալման գործով տուժողների ներկայացուցիչ Սեդա Սաֆարյանի ու նրա եղբայր Ստյոպա Սաֆարյանի հայտարարություններին։

Գոռ Աբրահամյանը գրել է.

«ՀՀ քրեական օրենսգրքի 300.1 հոդվածի վերաբերյալ ՀՀ Սահմանադրական դատարանի որոշումից հետո ոմանց կողմից պոստֆակտում Դատախազության ուղղությամբ հնչում են մեղադրանքներ, որոնց իրականության մեջ ջայլամային կենսակերպ լինելը հասկանալի է լայն հանրությանը։

Վստահ ենք՝ ակնհայտ է հատկապես սույն գործին առնչված անձանց և նրանց եղբայրների արձագանքի խղճուկ լինելու հանգամանքը՝ նկատի ունենալով, որ գործի ողջ քննության ընթացքում սույն սուբյեկտները որևէ խնդիր չեն բարձրացրել, մինչդեռ հիմա իրենց իրավունք են վերապահում այլոց գործողությունները ենթարկել տարատեսակ մեկնաբանությունների՝  չհասկանալով կամ չհասկանալու տալով, որ հանցագործության որակումը ճաշակով չի լինում, հասարակության ալեկոծմամբ կամ ՍԴ հնարավոր կամ հավանական որոշման դեմն առնելու տրամաբանությամբ չի առաջադրվում և չհասկանալով   մեղադրանք փոխելու կարգը։

Գործ ունենք իրավական գործընթացների հետ՝ անկախ հանրային այլևայլ արձագանքից։
Դատախազությունը սույն գործին առաջին իսկ պահից վերաբերվել է ազնիվ, խորը գիտական վերլուծությունների վրա հիմնված թիմային իրավական եզրահանգումներով։

Դատախազությունը պատասխանատու և հետևողական է իր բոլոր դիրքորոշումներում՝ անկախ երեկվա, այսօրվա կամ վաղվա իրողություններից, և այդ դիրքորոշումները ինչպես երեկ, այնպես էլ վաղը, կլինեն հրապարակային ու պարզ։

Ընթացող իրողություններով բոլոր հետաքրքրվածներին հորդորում ենք հարգել իրավական պետության բացառապես իրավական կարգավորումները, լցվել համբերությամբ և ամենակարևորը՝ առաջնորդվել ազնվությամբ, այլ ոչ թե օրվա կոնյուկտուրայով կամ պահի թելադրանքով։ 
Աստված է բոլորիս դատավորը»։

Հիշեցնենք, որ ՍԴ որոշման համաձայն 300.1 հոդվածը հակասում է Սահմանդրության 78 և 79 հոդվածներին։

Սահմանադրության 78-րդ հոդվածը սահմանում է համաչափության սկզբունքը, իսկ 79-րդ հոդվածը՝ որոշակիության սկզբունքը:

ՍԴ տվյալ հոդվածի Սահմանադրությանը համապատասխանելու հարցով դիմել էին ՀՀ երկրորդ նախագահ Ռոբերտ Քոչարյանը և Երևանի ընդհանուր իրավասության դատարանի դատավոր Դավիթ Գրիգորյանը։ Ի դեպ, վերջինի նկատմամբ ՍԴ դիմելուց հետո հետապնդումներ սկսվեցին։

ՀՀ ՔՕ 300.1 հոդվածը սահմանում է սահմանադրական կարգը տապալումը, որով մեղադրանք է առաջադրված ՀՀ երկրորդ նախագահ Ռոբերտ Քոչարյանին, ԶՈւ ԳՇ նախկին պետ Յուրի Խաչատուրովին, պաշտպանության  նախկին նախարար Սեյրան Օհանյանին, ՀՀ նախագահի աշխատակազմի նախկին ղեկավար Արմեն Գևորգյանին։