Ձեր վստահելի աղբյուրը

«Մենք մեր կարգախոսը դարձրինք «Առանց թուրքի Հայաստան»-ը, և շատերը կարծիք հայտնեցին, թե դա ծայրահեղական քայլ է, բայց վերջին 10 օրերը ցույց տվեցին, որ, այո՛, մենք շատ արագ պետք է ունենանք առանց թուրքի Հայաստան»,- այսօր «Հայրենիքի փրկության շարժման» հանրահավաքի ընթացքում ասաց շարժման համակարգող խորհրդի անդամ Իշխան Սաղաթելյանը։

Իշխանության բացած «Օվերտոնի պատուհանը»՝ դեպի թուրքասիրություն

«Տասը օր առաջ վարչապետի աթոռը զբաղեցնող անձն ասաց, որ մենք թուրքին ընկալում ենք թշնամի, թուրքն էլ մեզ է այդպիսին ընկալում, բայց շատ կարևոր է հասկանալ այն մեկնակետը, թե որտեղից է սկսվել այդ մեկնակետը։ Հասկանո՞ւմ եք՝ ինչ է ասում։ Կասկածի տակ է դնում 1.5 մլն հայերի բնաջնջումը, փորձում է ուրանալ Հայոց ցեղասպանությունը, հրաժարվում է հայոց պահանջատիրությունից։ Եվ հետոարդեն, ԱԽ քարտուղարը հայտարարեց, որ Թուրքիայի հանդեպ մեր մոտեցումներում շտկումներ անենք։ Սիրելի հայրենակիցներ, ամեն ինչ պարզ է և հստակ՝ ով կուրանա Հայոց ցեղասպանությունը, կուրանա Արցախյան երեք պատերազմներում զոհված տասը հազար հայերի արյունը, նա հայ ժողովրդի թշնամին է և վերջ»։

Թուրքիան արդեն «դեսպանատուն» ունի ՀՀ-ում

«Այս պահից սկսած ՀՀ անվտանգության խորհրդի շենքը թուրքական դեսպանատուն է Հայաստանում, իսկ ԱԽ քարտուղարը՝ Թուրքիայի դեպսանն ու շահերը սպասարկողն է։ Հետևաբար ՀՀ քաղաքացիներ ԱԽ քարտուղարին պետք է վերաբերվեն իբրև Թուրքիայի գործակալի։ Ամեն ինչ շատ պարզ է և հստակ՝ ՀՀ-ում կա երկու քաղաքական գիծ։ Մեկը Նիկոլն է և իր խմբակը, որը երեք տարի առաջ կեղծ լոզունգների տակ եկավ իշխանության և պլանավորված հանձնեց Արցախը։ Այս փուլում այդ խմբակը փորձում է ուրանալ ամեն ինչ։ Դեռ մեր տղերքի արյունը չչորացած, վիրավորների վերքերը չապաքինված, արդեն փորձում են Թուրքիայի և Ադրբեջանի հետ եղբայրություն սկսել։ Սրանց նպատակն է հրաժարվել մեր ինքնությունից, ազգային մշակույթից և բանակից։ Նրանք ուզում են հայ ժողովրդին տանել կործանման»։

Ազգային պետություն ունենալու նպատակը

«Երկրորդ ուղղությունը մենք ենք, դուք եք, այս տեսակն է, որն ուզում է պահպանել մեր ազգաին արժեքները, մեր պետականությունը, Արցախը, որն ուզում է կառուցել ազգային պետություն՝ չզիջելով ոչինչ։ ՀՀ-ում պետք է հաղթի այդ ուղղությունը։ Շատերն ասում են՝ շարժումը մարել է, այն ձեռքբերումներ չի ունեցել։ Այո՛, շարժումն իր վերջնական նպատակներին չի հասել, քանի դեռ այս դավաճանները կան։ Եթե չլիներ այս շարժումը, ապա գլխավոր ուռուցքը տարածում կստանար»։

Շարժման առաջիկա՝ եռափուլ անելիքները

«Նիկոլը հայտարարել է արտահերթ ընտրությունների մասին, նա փորձելու է դրա միջոցով փրկել իր կաշին։ Բայց նրա հայտարարությունը որևէ հիմք չէ, որ մենք մտածենք, թե լինելու են արտահերթ ընտրություններկ, ուստի մենք շարժվելու ենք մեր օրակարգով։ Ուրեմն, մինչև իր հրաժարականը մենք շարունակում ենք մեր գործողությունները երեք պայմանական փուլերով՝ մինչև իր հրաժարականը, հրաժարականից հետո, և հրաժարականին հաջորդած 14 օրերից հետո։ Առաջին փուլում շարժումը սկսում է մարզային այցելություններն ու հանդիպումները տարբեր խմբերի հետ։ Մեր նպատակն է սրա հեռացման համաժողովրդական պահանջն ավելի լավ կազմակերպելը։ Երկրորդ փուլում, եթե նա հրաժարական տա, 14 օրերի ընթացքում պետք է այդ դե յուրե հրաժարականը դարձնենք դե ֆակտո, և այդ օրերին պետք է նրան հեռացնենք»։

Եթե լինեն արտահերթ ընտրություններ, կամ՝ երրորդ փուլ

«Եվ երրորդ փուլը. եթե անկախ մեր կամքից երկիրը գնա ընտրությունների, ապա երկու կարևոր բան պետք է հայտարարեն այդ ընտրություններին մասնակցող քաղաքական ուժերը։ Առաջին. որևէ պարագայում, որևէ կուսակցություն որևէ ձևաչափով չի համագործակցելու այդ դավաճանի հետ։ Երկրորդ. այդ ընտրությունները չպետք է լինեն ստանդարտ, սովորական ընտրություններ։ Պետք է լինի դավաճաններին հեռացնելու, հայրենիքը փրկելու ծրագիր՝ ընտրության միջոցով»։