Ձեր վստահելի աղբյուրը

«Մենք չենք մոռացել ու չենք էլ մոռանալու դատական համակարգի նկատմամբ գործող իշխանությունների արարքները. հետևաբար այն որոշումը, որն օրեր առաջ ընդունեց բարձրագույն դատարանը, կարելի է ասել, իշխանության քիմքին հարմար դատավորների կողմից արվեց, ուստի ասել, թե դա կեղծիք է, կամ հակաօրինական որոշում է, անթույլատրելի է»,- այսօր հրավիրված ասուլիսում ասաց ՀՀԿ-ական նախկին պատգամավոր Հովհաննես Սահակյանը՝ անդրադառնալով ՍԴ-ի կողմից Քրեական օրենսգրքի 300.1 հոդվածը հակասահմանադրական ճանաչելուն։

Նրա խոսքով, այն հոդվածը, որով մեղարում էին ՀՀ երկրորդ նախագահ Ռոբերտ Քոչարյանին, այլևս գոյություն չունի, և այն ամբողջ ողնաշարը, ինչի հիման վրա կառուցել էին քրեական գործը, հակսահմանադրական է։

«Կա ընդամենը մի կնոջ անհեթեթ ցուցմունք, որի հիմքով այլևս ամոթ է գործը քննելը։ Ուստի այս իշխանությունները կա՛մ պետք է նոր գործ կարեն, կա՛մ նամուս ունենան ու գնան ներողություն խնդրելու։ Հետևաբար, սա լավ լակմուսի թուղթ է, որպեսզի մենք ցույց տանք, թե ինչ է իրենից ներկայացնում ՀՀ այս նոր իշխանությունը։ Սա է ամբողջ իրենց պատկերացումը, երբ քննիչին ցուցումներ են տալիս, այն դատավորներին, որոնց վնգստացող են անվանում, ոչ թե զանգում են, այլ կանչում են իրենց կաբինետներ, ցուցում տալիս և գնում առաջ։ Սա է իրենց պատկերացրած արդարադատությունը»,- նշեց նա։

Հովհաննես Սահակյանը նկատեց՝ այսօր օրը ցերեկով նախարարը կարող է ծեծել լրագրողին, բայց իրավապաշտպան որևէ կառույց ձայն չի հանում, մինչդեռ տարիներ շարունակ գործում էին գրանտներ շահած կազմակերպությունները։

«Դուրս է գալիս, որ նախկին իշխանություններն էին այդ կազմակերպությունների բանի տեղ դնում, որ իրենք էլ կարողանում էին ծպտուն հանել։ Այսուհետ, այդ կառույցները, այդ իրավապաշտպանները խոսելու տեղ չունեն»,- ասաց նա։

Ըստ քաղաքական գործչի, ՀՀ երկրորդ նախագահի շուրջ կատարվողը մի մեծ փուչիկ էր, որը պայթեց, թեև երեք տարի շարունակ հասարակությանը հենց այդ «ֆարսով էին սնում»։

«Հիմա ՍԴ-ն հաստատեց, որ 3 տարի շարունակ Ռոբերտ Քոչարյանի նկատմամբ տեղի է ունեցել քաղաքական հետապնդում։ ՍԴ-ն իր կնիքը դրեց և կեղծ արդարադատության խարանը դաջեց այս իշխանության ճակատին»,- շեշտեց նա։

Հովհաննես Սահակյանը վստահություն հայտնեց, որ ժողովրդի կեսից ավելին համաձայն չէ արտահերթ ընտրությունների միջոցով այս «դավաճանական խունտային» հեռացնելու հետ, և դա այս իշխանություններն էլ են հասկանում.

«Եվ իշխանություններն էլ, տեսնելով, որ ընդդիմությունը գնում է սահմանադրական ճանապարհով, փորձում է ձգձգել իր հեռանալը։ Ես վստահ չեմ, որ Նիկոլը հրաժարական է տալու և գալու է արտահերթ ընտրությունների»։