Ձեր վստահելի աղբյուրը

ՀՅԴ անդամներն այս պահին բողոքի ակցիա են իրականացնում Հայաստանի անվտանգության համար պատասխանատու կարևոր կառույցներից մեկի՝ Ազգային անվտանգության խորհրդի շենքի մոտ։

«Ազգային անվտանգության խորհուրդն իր գլխավոր քարտուղարով դարձել է Հայաստանում Թուրքիայի դեսպանատուն։ Իսկ խորհրդի քարտուղար Արմեն Գրիգորյանն այլևս կարող է հանգիստ ասել, որ Հայաստանում Թուրքիայի դեսպանն է»,- հայտարարեց դաշնակցական գործիչ Գեղամ Մանուկյանը։

Նա ընդգծեց, որ այդ կառույցը Նիկոլ Փաշինյանի ձեռքում դարձել է գործիք հայ ժողովրդի հիշողությունը, պայքարն ուրանալու, Թուրքիայի կողմից ցեղասպանության ենթարկված 1.5 մլն նահատակներին մոռանալու, Էրդողանի գիրկն ընկնելու համար։

Գեղամ Մանուկյանը, որ առաջնորդում էր ակցիան, պնդում է՝ այդ մարդիկ պետք է դուրս նետվեն պետական համակարգից, քանի որ հստակ քայլերով արցախյան պատերազմը տանուլ տալուց հետո Հայաստանը նետում են Թուրքիայի գիրկը։

«Դեռ երկու տարի առաջ՝ ջահերով երթից հետո նիկոլականներից մեկը սպառնացել էր, որ քրեական գործ պետք է հարուցվի Թուրքիայի դրոշը վառողների դեմ։ Այն ժամանակ հատուկ Թուրքիայի դրոշն այրեցինք՝ասելով, որ մեր երիտասարդները տեր են հայության հիշողությանը, պայքարին։ Արդեն երկու տարուց ավելի է, որ այս իշխանություններն իրենց քաղաքականությամբ, քայլերով մոռացության են տալիս հայության հիշողությունը։ Դա անհնար է լինելու»,- նշեց Մանուկյանը։

Նա հիշեցեց, որ Ազգային անվտանգության խորհրդի շենքը շրջափակած ոստիկանների նախնիներն էլ զոհ են գնացել թուրքական յաթաղանին։

«Այսօր պետական, տեղական ինքնակառավարման մարմիններում աշխատող մարդկանց ստիպում են մոռանալ իրենց պատմությունը։ Իսկ դա անհնար է։ Հայ ժողովուրդը թույլ չի տա, որ Հայաստանի Հանրապետությունը դառնա Թուրքիայի վիլայեթներից մեկը»,- ասաց նա։

Մանուկյանը հիշեցրեց, որ «գլխավոր հողատուն» սկսել է նախընտրական քարոզչությունն ու ամենուր կրկնում է «թշնամու թշնամին, թշնամու թշնամին» մոլոգարություն հիշեցնող նախադասությունը։

«Դրա նպատակը մեկն է՝ ապրիլի 24-ի նախօրեին վիժեցնել աշխարհասփյուռ հայության, Հայ Դատի համառ պայքարը՝ Հայոց ցեղասպանության ճանաչման համար»,- ընդգծեց նա։

Ի դեպ, մինչ Մանուկյանը ելույթ էր ունենում, շենքի ներսից աշխատակիցները մեկը պատուհանից այն կողմ՝ վարագույրի հետևում թաքնված, նկարահանում էր ակցիան։

Ակցիայի մասնակից դաշնակցականները շենքի դիմաց այրեցին Թուրքիայի դրոշը՝ վանկարկելով «առանց Նիկոլ», «առանց թուրքի» Հայաստան։

«Մենք այս դրոշն այրեցիք, որպեսզի ցույց տանք, որ ազգային արժանապատվություն ունեցող մարդկանց համար Թուրքիան ու Ադրբեջանը թշնամիներ են, և կլինեն այնքան ժամանակ, քանի դեռ մեր պահանջատիրությունը չի հասել իր տրամաբանական ավարտին»,- ասացին ակցիայի մասնակիցները։

Հիշեցնենք, որ Հանրային հեռուստատեսության եթերում Պետրոս Ղազարյանի հաղորդման ժամանակ հարցին՝ «Մենք Թուրքիային թշնամի համարո՞ւմ ենք, թե՞ ոչ», Անվտանգության խորհրդի քարտուղար Արմեն Գրիգորյանը պատասխանել է. «Թուրքիայի հանդեպ մեր մոտեցումներում որոշակի շտկումներ պետք է լինեն և մենք այդ ուղղությամբ աշխատում ենք»։

Ակցիայի ուղիղ հեռարձակումը՝ News.am-ի։