Ձեր վստահելի աղբյուրը

Ռուսաստանը թույլ չի տա Ամերիկայի Միացյալ Նահանգներին կամ որևէ այլ երկրի խոսել իր հետ «ուժի դիրքերից»: Այս մասին ասել է Ռուսաստանի Դաշնության նախագահի մամուլի քարտուղար Դմիտրի Պեսկովը՝ այսօր լույս տեսած «Аргументы и факты» թերթին տված հարցազրույցում, գրում է Tass-ը։

«Ոչ ոք թույլ չի տա, որ Ամերիկան Ռուսաստանի հետ խոսի ուժի դիրքերից: Դա անհնար է: Ամերիկացիները հիմա մանթրայի պես կրկնում են, ասում են, որ մենք բոլորի հետ խոսելու ենք ուժի դիրքերից: Ոչ Պուտինը, Ռուսաստանի ղեկավարությունից ոչ ոք թույլ չի տա ոչ ամերիկացիներին, ոչ էլ որևէ մեկին մեզ հետ այդպես խոսել: Դա բացառվում է», - ասել է Կրեմլի խոսնակը:

Պատասխանելով այն հարցին, թե հնարավո՞ր է ԱՄՆ-ի հետ դիվանագիտական հարաբերությունների խզում, Պեսկովն ասել է․ «Ես չէի ցանկանա խոսել ծայրահեղ սցենարների մասին»:

Մեկնաբանելով ԱՄՆ-ում ՌԴ դեսպան Անատոլի Անտոնովի` Մոսկվա խորհրդակցությունների կանչվելը, պետության ղեկավարի մամուլի քարտուղարը հիշեցրել է, որ խոսքը վերաբերում է Սպիտակ տան ներկայիս վարչակազմի օրոք ռուս-ամերիկյան երկկողմ հարաբերությունների աուդիտին:

«Դրանից հետո արդեն կձևակերպվի որոշակի հասկացողություն այն մասին, թե ուր պետք է շարժվել», - ասել է Պեսկովը:

Նա դրական է պատասխանել հարցին, թե դեռ կա՞ն ընդհանուր թեմաներ, որոնց մասին Ռուսաստանը և ԱՄՆ-ն կարող են խոսել:

«Սա ռազմավարական կայունությունն է, զենքի վերահսկումը, տարածաշրջանային հակամարտությունների կարգավորումը: Այն հակամարտությունները, որտեղ Միացյալ Նահանգների դերը կարող է ինչ-որ գործնական նշանակություն ունենալ», - ասել է Պեսկովը, հավելելով, որ անհրաժեշտ է ԱՄՆ-ի հետ խոսել Իրանի միջուկային ծրագրի (JCPOA) վերաբերյալ գործողությունների համատեղ համապարփակ ծրագրի և «աշխարհի շատ այլ խնդրահարույց իրավիճակների» շուրջ: