Ձեր վստահելի աղբյուրը

«Սահմանադրական դատարանն ասաց՝  Քրեական օրենսգրքի 300.1 հոդածը հակասում է  Սահմանադրությանն ու անվավեր է: Պետք է փաստել, որ այդ հոդվածն այլևս չկա: Հիմա՝ գոյություն չունեցող հոդվածով շարունակվում է  քրեական հետապնդումը»,- «Կենտրոն» հեռուստաընկերության «Իմպուլս» հաղորդման ժամանակ ասել է ՀՀ երկրորդ նախագահ Ռոբերտ Քոչարյանի պաշտպանական թիմ անդամ Հայկ Ալումյանը:

Նա նշել է, որ սա նշանակում է՝ սրանից ավելի ծայրահեղ, ավելի լուրջ իրավախախտում, որն արդեն սահմանակից է հանցաքին, դժվար է  պատկերացնել, հանցանք՝ դատարանի կողմից:

«Սա իրավաբանական տեսանկյունից բացարձակ գռեհիկ իրավախախտում կարելի է համարել»,- նշել է փաստաբանը:

Նա ասել է, որ եթե Սահմանադրական կարգի ենթադրյալ տապալման գործը քննող Երևան քաղաքի ընդհանուր իրավասության դատարանի դատավոր Աննա Դանիբեկյանը չդադարեցնի քրեական հեապնդումը 300.1 հոդվածով, ամենայն հավանականությամբ, հանցագործության մասին հաղորդում կներկայացնեն, որովհետև հենց այս պահին էլ, ըստ իրենց գնահատմամբ, արդեն իսկ գոյություն ունի և շարունակվում է հանցագործության դեպքը, այն է՝ գոյություն չունեցող հոդվածով անձանց նկատմամբ քրեական հետապնդում է  իրականացվում:

Ռ.Քոչարյանի պաշտպանի խոսքով, դատարանը պարտավոր էր քրեական հետապնդումը դադարեցնել անկախ իրենք համապատասխան միջնորդությունը ներկայացրել են կամ չեն ներկայացրել:

Հարցին՝ եթե վաղ թե ուշ այս գործը պետք է կարճվի, ի՞նչ իմաստ ուներ, որ երեկվա դատական նիստին դատախազները չէին ներկայացել, Հայկ Ալումյանը պատասխանել է. «Չգիտեմ՝ ինչ պլաններ ունեն ապագայի համար: Տպավորությունն այն է, որ այս գործի կարճվելու հետ չհամակերպվողը դատախազությունում չի նստած, մի քիչ այն կողմ՝ դեպի Հանրապետության հրապարակ, հենց դիմացի կողմը: Այնտեղ նստածը չի համակերպվում, հիմա միջոցներ է փնտրում կամ հանձնարարություն է իջեցված բոլոր՝ կապ չունի օրինական, անօրինական,  բայց օրինական ճանապարհ չկա, ինչ-որ ձևով ռեանիմացնել այս քրեական հետապնդումը»:

Նա նշել է, որ խորը մոլորության մեջ են գտնվում այն մարդիկ, ովքեր կարծում են, որ օրենքի շրջանակում կարող են վերաորակել մեղադրանքն ու նոր հոդվածով քրեական հետապնդում իրականացնել Ռոբերտ Քոչարյանի և մյուս մեղադրյալների նկատմամբ. «Քրեական դատավարական ընթացակարգ չկա, որի միջոցով դա հնարավոր է անել առանց օրենքն ուղղակի ոտնատակ տալու»:

Հայկ Ալումյանը նշել է, որ հիմա մանիպուլյացիաներ են գնում, թե «մարտի 1»-ի 10 զոհերի գործը փակվեց. «Տաս զոհերի վերաբերյալ  գործը հիմա դատարանում գտնվող գործի հետ ընդհանրապես ընդհանուր ոչ մի բան չունի, բացի նրանից, որ այդ երկու գործը վերաբերում է նույն օրվա նույն իրադարաձություններին, բայց քննվում են այդ դեպքերի հետ կապված տարբեր հանգամանքներ:

Եթե տաս զոհերի խնդիր է, հետաքրքրվեք, թե Հատուկ քննչական ծառայությունը ինչու մինչև հիմա մեկի սպանության հանգամանքները չի բացահայտել»:

Փաստաբանն ասել է՝ ունեն բազմաթիվ փաստարկներ, որ այս գործն իրականում շինծու, ոչնչի վրա չհիմնված գործ է:

«ՍԴ որոշումն էլ է արդարացման ձև: Եթե անձին մեղադրում են մի հոդվածի մեջ, որը  հակասահմանադրական է, հետևաբար իրեն մեղադրում են մի արարքի մեջ, որը հանցագործություն չէ: ՍԴ-ն ասաց՝ այն հոդվածը, որով մեղադրում եք, հակասահմանադրական է, այսինքն այդպիսի արարքը չպետք է լիներ քրեորեն պատժելի: Սա նշանակում է, որ մեր պաշտպանյալն այդ մեղադրանքով արդարացված է: Հենց ուղիղ դա է նշանակում:

Դատավարության ցանկացած փուլում մենք ունեինք ոչ պակաս ծանրակշիռ փաստարկներ, եթե յուրաքանչյուրի վերաբերյալ օբյեկտիվ քննություն լիներ, տասնապատիկ արդարացումներ պետք է լինեին: Եթե օրենքը նախատեսեր, որ մարդու կարելի է տաս անգամ նույն մեղադրանքով արադարացնել տարբեր հիմքերով, համոզված եղեք, որ տաս անգամ տարբեր հիմքերով արդարացվելու էր, եթե քննությունը լիներ  օբյեկտիվ»:

Հայկ Ալումյանը նշել է՝ իրեն շատ է անհանգստացնում, որ ՀՀ Քրեական օրենսգրքում սահմանադրական կարգի տապալում հոդված չկա.

«Այն մարդիկ, ովքեր դատարանների շենքերը փակել էին տալիս, մենք բոլորս հույս ունեինք, որ իրենք սահմանադրական կարգի տապալման հոդվածով հենց դատվելու են, որովհետև սա է սահմանադրական կարգի տապալման դասական օրինակ, երբ գործադիր իշխանությունը հրահանգում է արգելափակել դատական իշխանությանը և ոստիկաններն էլ կանգնած հետևում են, որպեսզի հասարակական կարգը պահպանվի:

Պատկերացնում եք ցինզիմի աստիճանը: Իրականում իրենք այս որոշման արդյունքում խուսափեցին ապագայում սահմանադրական կարգի տապալման համար պատասխանատվությունից»:

Մանրամասները՝ տեսնայութում: