Ձեր վստահելի աղբյուրը

Արցախում ՌԴ խաղաղապահ զորախմբի շարժական ավանները կգործարկվեն ապրիլի 5-ից ոչ ուշ, իսկ խաղաղապահների համար շարժական հիվանդանոցը կբացվի ապրիլի վերջին: ՌԴ ՊՆ-ի փոխանցմամբ, այդ մասին լրագրողներին ասել է Պաշտպանության փոխնախարար, բանակի գեներալ Դմիտրի Բուլգակովը:

Նա մասնակցել է Ստեփանակերտում մեկ այլ՝ 250 խաղաղապահի համար նախատեսած բլոկ-մոդուլային ավանի բացման արարողությանը: Նման ավաններում յուրաքանչյուր բնակելի մոդուլ գործում է փակ ցիկլով:

«Այսօրվա դրությամբ մենք ավարտում ենք 25 նման ավանների կառուցումը, սարքավորումների տեղադրումը, գործարկումն ու կարգաբերումն ընթացքի մեջ են: Բոլորը շահագործման կհանձնվեն ոչ ուշ, քան մինչև ապրիլի 5-ը, այսինքն՝ մեր բոլոր խաղաղապահները կտեղավորվեն»,- ասել է բանակի գեներալը:

Բուլգակովը հայտնել է, որ Ռուսաստանի Դաշնության պաշտպանության նախարար Սերգեյ Շոյգուի որոշմամբ էլ Արցախում կառուցվում է շարժական հիվանդանոց, որտեղ, անհրաժեշտության դեպքում, խաղաղապահներին կտրամադրվի որակյալ օգնություն հատուկ նշանակության բժշկական ստորաբաժանման կողմից:

Ռազմական գերատեսչության ղեկավարի տեղակալը պարզաբանել է, որ շարժական հիվանդանոցի տեղադրումը կսկսվի ոչ ուշ, քան ապրիլի 5-7-ը, և այն կավարտվի ամսվա վերջին:

«Ապրիլի վերջին մենք պետք է ավարտենք մեր խաղաղապահ ուժերի ամբողջական տեղակայումը բոլոր ուղղություններով»,- հավելել է ռազմական գերատեսչության ղեկավարի տեղակալը:

Փոխնախարարը հիշեցրել է, որ արդեն մի քանի տարի է, ինչ ռազմական գերատեսչությունը Ռուսաստանի զինված ուժերի համար կառուցում է բլոկ-մոդուլային ավաններ՝ Ռուսաստանի հեռավոր շրջաններում, դժվարամատչելի վայրերում, մասնավորապես՝ հյուսիսում: Նման ավանները մշակված և փորձարկված լուծումներ են:

Երեք ամսից էլ պակաս ժամանակահատվածում Արցախում կառուցվել և շահագործման են հանձնվել Ստեփանակերտի, Գետավանի, Մարտունու, Ասկերանի 12 բլոկ-մոդուլային ավաններ: Մոտ ապագայում նման քաղաքները կհավաքվեն Սիսիան -2, Ճարտար, Լաչին, Սոս, Կարմիր Շուկա, Մարտակերտ, Շուշի և այլ բնակավայրերում:

Ավանների շինարարության մեջ ներգրավված էր 589 ռազմական շինարար և 45 միավոր տեխնիկա: Բացի այդ, ռազմական գերատեսչության նյութատեխնիկական ապահովման մասնագետները լրացուցիչ աշխատանքներ են իրականացնում բլոկ-մոդուլային ավանների հարակից տարածքներում կանաչապատման բարելավման և ծառերի տնկման ուղղությամբ:

Քաղաքներում գտնվող մոդուլները հագեցած են մահճակալներով, զգեստապահարաններով, սեղաններով և աթոռներով, լոգարաններով, ինչպես նաև կենցաղային տեխնիկայով (լվացքի մեքենաներ, հեռուստացույցներ, օդորակիչներ, կաթսաներ): Յուրաքանչյուր քաղաքի տարածքում կա մարզադահլիճ արհեստական խոտածածկով, լոգարան, բժշկական կենտրոն, չորանոց, հագուստի մաքրման սենյակ, հանգստի սենյակ, գրասենյակ, պահեստ, ճաշարան և մթերային խանութ: