Ձեր վստահելի աղբյուրը

«Պետական գնումները, ինչպես հաճախ ենք նշել, տեղական արտադրության խթանման լավագույն գործիքը չէ, բայց հաշվի առնելով  հակաճգնաժամային գործողություններ անելու անհրաժեշտությունը, փորձել ենք չհակասելով ստանձնած միջազգային պարտավորություններին և օրենքի սկզբունքներին, այս մեխանիզմով նմանատիպ գործիք կիրառել»,- կառավարության նիստում հայտնեց Ֆինանսների նախարարի առաջին տեղակալ Կարեն Բրուտյանը:

Նա զեկուցեց Պետական գնումների ընթացակարգերում հակաճգնաժամային միջանկյալ մեխանիզմի կիրառման պայմանները սահմանելու մասին որոշման նախագիծը:

Բրուտյանի ներկայացմամբ՝ 1 միլին դրամը գերազանցող և մրցակցային ձևով կնքված գնումների պայմանագրերի բոլոր կողմերին՝ շինարարներին, մատակարարներին, ծառայություններ մատուցողներին առաջարկվում է օգտվել պետական բյուջեի սուբսիդիանի աջակցության մեխանիզմից:

«Այն կազմակերպությունները, որոնք  իրենց պայմանագրերը կատարելու ժամանակ կօգտագործեն ավելի քան 50 տոկոս տեղական ծագման ապրանքներ, աշխատանքներ և ծառայություններ, և այդ փաստը համապատասխան ընթացակարգերով կհիմնավորվի՝ պայմանագրի գնի 1 տոկոսի չափով սուբսիդավորում կարող են ստանալ»,- հայտնեց Կարեն Բրուտյանը:

Նա նկատեց, որ դրանով փորձել են նվազեցնել ընկերությունների ծախսերը և խթանել տեղական արտադրությանը:

Փոխնախարարի խոսքով՝ քանի որ մրցակցային գնումների ծավալն այս տարի կազմելու է 112 մլրդ դրամ, գործիքի կիրառման արդյունքում տնտեսության աջակցությունը կարող է կազմել առավելագույնը 1 մլրդ 120 մլն դրամ:

Նա նաև նկատեց, որ եթե առաջիկայում էկոնոմիկայի նախարարության հետ ավելի լավ գործիք մշակեն, ապա  անպայման հանդես կգան առաջարկով: