Ձեր վստահելի աղբյուրը

«Մենք առաջարկում ենք գնալ բաց համամասնական համակարգին»,- այսօր ԱԺ արտահերթ նիստի ընթացքում ասաց ԱԺ «Լուսավոր Հայաստան» խմբակցության պատգամավոր Գևորգ Գորգիսյանը։

Նա նկատեց, որ ռեյտինգային ընտրական համակարգը հնարավորություն է տալիս հարուստներին՝ օգտագործել իրենց ռեսուրսները, որպեսզի ձայն հավաքեն, բայց քաղաքացուն պատգամավորի օգտին քվեարկելու հնարավորությունից ամբողջությամբ զրկելն էլ ճիշտ չէ։

«Դա հղի է նրանով, որ մենք ունենալու ենք զուտ կոճակ սեղմողների ԱԺ։ Պատգամավորը, որը չունի որևէ պատճառ այսօր պատասխանատվություն ցուցաբերելու, քանի որ քաղաքացիները չեն ընտրելու նրան, չի ունենա պատճառ՝ աշխատելու ի նպաստ պետության։ Այդ պատգամավորները լինելու են զուտ կոճակ սեղմողներ»,- նշեց Գևորգ Գորգիսյանը։

Հիշեցնենք, որ Խորհրդարանն արտահերթ նիստով քննարկում է «ՀՀ ընտրական օրենսգիրք» սահմանադրական օրենքում փոփոխություններ և լրացումներ կատարելու մասին օրենքի նախագիծը։