Ձեր վստահելի աղբյուրը

«Եթե օրակարգում ներառված հարցերի հետ կապված առարկություն ունեին, կարող էին գալ ու տեղում ասեին՝ առաջարկելով հանել այդ հարցերը»,- ԵՊՀ հոգաբարձուների խորհրդի չկայացած նիստից հետո լրագրողների հետ զրույցում ասաց խորհրդի քարտուղար Միքայել Մալխասյանը։

Հիշեցնենք, որ այսօր Երևանի պետական համալսարանի  հոգաբարձուների խորհրդի նիստը չի կայացել՝ կառավարության անդամների բացակայության հետևանքով քվորում չապահովելու պատճառով: 

Միքայել Մալխասյանը նշեց, որ ինքը որևէ հարց օրակարգ չի բերել, բոլոր հարցերն այն հարցերն էին, որոնք պետք է պարտադիր լինեին օրակարգում, քանի որ կային համապատասխան հիմքեր:

«Խորհրդի ցանկացած անդամ իրավունք ունի առաջարկելու այս կամ այն հարցն օրակարգում ներառել»,- ասաց Միքայել Մալխասյանը:

Նա հայտնեց, որ պետք է նորից գումարվի նիստ՝ նույն օրակարգով, հաջորդ շաբաթ հավանաբար ծանուցում կուղարկի խորհրդի անդամներին ևս մեկ անգամ հավաքվելու և օրակարգային հարցերը քննարկելու համար, թեև մտավախություն ունի, որ հնարավոր է այդ նիստն էլ տապալվի:

Մ. Մալխասյանի խոսքով, բոյկոտը հարցի լուծման ձև չէ, եթե առարկություններ ունեն կամ կարծում են, որ հետագայում գործընթացը կապված է նոր օրենքի ընդունման կամ չընդունման հետ, թող տեղում ասեն. «Եթե խնդիրն իսկապես ռեկտորի ընտրության հարցն է, թող գան, տեղում ասեն այդ հարցը հանենք օրակարգից, լսենք միայն ռեկտորի հաշվետվությունն ու օրակարգային այլ հարցեր:

Ստացվում է՝ պետք է ամիսներով անգործության մատնվենք, հոգաբարձուների խորհուրդն այնքան ժամանակ չգործի, մինչև նոր օրենսդրական կարգավորումնե՞րը,  խորհուրդը լուծարվի, նոր խորհուրդ հրավիրիվի՞: Կարող է ամիսներ տևի, նաև տարուց ավելի»:

Հարցին՝ այս գործողություններում քաղաքական հրահանգ տեսնո՞ւմ եք, նա պատասխանեց. «Ես չեմ կարող նման որևէ բան ասել, ես ինքս քաղաքական որևէ գործընթացի հետ կապ չունեմ, չեմ էլ ուզում կապ ունենալ: Այս  իրավիճակում պարատվոր ենք առաջնորդվել ԵՊՀ շահերով, ոչ թե այս կամ այն խմբային շահերի տեսանկյունից»: