Ձեր վստահելի աղբյուրը

«Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքով պետական պաշտոններ զբաղեցնող անձանց և նրանց ընտանիքի անդամներին տրամադրվում է սոցիալական փաթեթ:

Գործող կարգով պետական համակարգի աշխատակիցները պետության տրամադրած սոցիալական փաթեթի միջոցները կարող են օգտագործել առողջապահության ծառայություններից օգտվելու, հիփոթեքային վարկի ամսական վճարի մարման, ուսման վճարի, Հայաստանի Հանրապետությունում և Լեռնային Ղարաբաղի Հանրապետությունում հանգստի համար:

Կառավարությունն այսօրվա չզեկուցվող հարցերի շարքում ընդունեց որոշում, որով վերոնշյալ ծառայություններին ավելացրեց մարզա-առողջարարական և սպորտային համալիրների, լողավազանների և այլ սպորտային կազմակերպությունների ծառայություններից օգտվելու հնարավորությունը:  Այսուհետ պետական համակարգի աշխատակիցներն բյուջեի միջոցների հաշվին ընտանիքներով կարող են գնալ մարզասրահ և լողավազաններ:

Ըստ կառավարության ներկայացրած հիմնավորման՝ այս փոփոխությունը  կնպաստի պաշտոնյաների ու պետական ծառայողների ընտանիքների «առողջ ապրելակերպի ձևավորմանը և ֆիզիկական կոփմանը»: Իրականում գործադիրը հարկատուների միջոցներով փորձում է ինչ-որ կերպ ակտիվացնել նման ծառայությունների մատուցման ոլորտը, որը համավարակի և պատերազմի հետևանքով շարունակում է մեծ վնասներ կրել: