Լավրովի հետ հանդիպմանն Արա Այվազյանն ընդգծել է Ադրբեջանում պահվող հայ ռազմագերիների և պատանդ պահվող անձանց վերադարձի կարևորությունը

10:06 02/04/2021 Հայաստան

Լավրովի հետ հանդիպմանն Արա Այվազյանն ընդգծել է Ադրբեջանում պահվող հայ ռազմագերիների և պատանդ պահվող անձանց վերադարձի կարևորությունը

ԱՊՀ ԱԳ նախարարների խորհրդի նիստին մասնակցելու նպատակով Մոսկվայում գտնվող ՀՀ ԱԳ նախարար Արա Այվազյանն ապրիլի 1-ին հանդիպում է ունեցել ՌԴ ԱԳ նախարար Սերգեյ Լավրովի հետ:

ԱԳՆ մամուլի և տեղեկատվության վարչության փոխանցմամբ, կայացած առանձնազրույցի ընթացքում արտգործնախարարները դիտարկել են ԼՂ հիմնահարցին առնչվող հարցերի լայն շրջանակ, որը ներառում է նաև հակամարտության գոտում 2020 թվականի նոյեմբերի 9-ի, ինչպես նաև հունվարի 11-ի եռակողմ հայտարարության իրականացման ընթացքն ու առկա զարգացումները:

Այս համատեքստում նախարար Այվազյանը շեշտել է ադրբեջանական կողմում՝ եռակողմ հայտարարությամբ ստանձնած պարտավորությունների կոպտագույն խախտմամբ պահվող հայ ռազմագերիների և պատանդի կարգավիճակում պահվող անձանց անհապաղ հայրենադարձման կարևորությունը:

Նախարար Արա Այվազյանը լուրջ մտահոգություն է հայտնել Ադրբեջանի վերահսկողության տակ հայտնված տարածքներում հայկական մշակութային և կրոնական կոթողների միտումնավոր թիրախավորման առնչությամբ՝ ընդգծելով այդ ժառանգության պաշտպանության ուղղությամբ տարբեր ձևաչափերով քայլեր ձեռնարկելու հրատապությունը:

Արտգործնախարարները հանգամանալից անդրադարձ են կատարել հայ-ռուսական դաշնակցային համագործակցության երկկողմ օրակարգի հարցերի լայն շրջանակի, բարձր մակարդակով շփումների առաջիկա ժամանակացույցին:

Հայաստանի և Ռուսաստանի արտաքին քաղաքական գերատեսչությունների ղեկավարները մտքեր են փոխանակել բազմակողմ ձևաչափում փոխգործակցության շուրջ:

Հարակից հրապարակումներ`

Մեկնարկեց Արա Այվազյանի և Սերգեյ Լավրովի հանդիպումը․ ԱԳՆ խոսնակ

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: