Ձեր վստահելի աղբյուրը

«Ողբում և հպարտանում ենք մեր քաջարի զինծառայողներով, որոնք կատարելով խնդիրը՝ նահատակվեցին հանուն հայրենքի և Ապրիլյան քառօրյայի և 44 օրյա պատերազմի ընթացքում»,- «Եռաբլուր» զինվորական պանթեոնում լրագրողների հետ զրույցում ասաց  ԶՈւ Գլխավոր շտաբի պետ Արտակ Դավթյանը:

Նրա կարծիքով, եթե Ապրիլյանից դասեր քաղած չլինեին, 44-օրյա հերոսամարտն այլ ելք կունենար, այլ ժամկետներով։

Հարցին՝ արդյո՞ք այս ելքը ողբերական չէր, դրանից  ավելի ի՞նչ վատ ելք պետք է լիներ, Ա. Դավթյանը պատասխանեց. «Մենք կարող էինք ամբողջությամբ կորցնել Արցախը ու դա կարող էր արվել 15-20 օրվա ընթացքում»։

Արտակ Դավիթյանի գնահատմամբ, Ապրիլյան քառօրյան մարտական գործողություններ էին, դասական գնահատմամբ պատերազմ չի կարելի որակել:

Խոսելով Գլխավոր շտաբում տիրող իրավիճակի մասին, նա նշեց, որ ԳՇ-ում իրավիճակը հանգուցալուծված է, որևէ խնդիր չկա, բնականոն աշխատում է:

«Դատարանի որոշումը և մեկնաբանությունները իրավաբանների գործն է, և յուրաքանչյուրն իր տեսակետից անում է մեկնաբանություն»,- ասաց նա:

Հարցին, թե ինչպե՞ս է աշխատում այն զինվորականների հետ, որոնք պահանջել են Փաշինյանի հրաժարականը, նա պատասխանեց. «Շատ լավ եմ աշխատում, որևէ խնդիր չկա: Կոլեկտիվն աշխատում է և կատարում այն խնդիրները, որոնք դրված են ԳՇ-ի առջև»:

Նա նշեց, որ ընդհանուր առմամբ տարածաշրջանում իրավիճակը բավականին լարված է. «Մեր սահմաններին հարաբերական կայունություն է, միջադեպեր որպես այդպիսին գրեթե չեն կիրառվում, սակայն ընդհանուր լարվածությունը, որը կա, շարունակվում է և դա ազդեցություն է ունենում և սահմանային ծառայության, և ընդհանուր մեր առօրյա կյանքի վրա»:

Հարցին՝ արդյոք 44-օրյա պատերազմի ժամանակ կիրառվել է «Իսկանդեր»,  Ա. Դավթյանը պատասխանեց. «Ոչինչ չեմ կարող ասել, որովհետև հրապարակման ենթակա չի»: