Ձեր վստահելի աղբյուրը

Վարչական դատարանում ԶՈւ ԳՇ պետի պաշտոնից իրավունքի ուժով ազատված Օնիկ Գասպարյանի փաստաբան Արամ Օրբելյանը մտադիր է վարչական դատարանից վերցնել այսօրվա նիստի ձայնագրությունը։ Չի բացառում, որ այն լսելու արդյունքում քրեական գործում որոշակի ավելացումներ արվեն։

«Պատասխանող կողմը արգումենտ է բերում, ասում է, քանի որ նման ակտ եք ընդունել վարչական դատարանում, բայց քանի որ մենք գտնում ենք, որ այդ ակտը կատարման ենթակա չէ, եկեք վերացրեք, քանի որ չենք կատարելու։ Նման մոտեցումները որևէ քննադատության չեն դիմանում»,- նիստի ավարտից հետո լրագրողների հետ զրույցում հայտարարեց Արամ Օրբելյանը։

Նա ընդգծում է, փոխարեն քննարկվի, թե ինչ անեն, որ հայցի ապահովման վերաբերյալ դատարանի ակտը կատարեն, քննարկվում է՝ բերեք, չեղարկենք։

Փաստաբանը նշում է, ցանկացած նորմալ երկրում, եթե պատասխանողի ներկայացուցչի խոսքը, մոտեցումը ինքնագլուխ էր, ապա նա գործից կազատվեր, իսկ եթե ինքնագլուխ չէր արել, ապա վարչապետը գործից կազատվեր։

«Բացառվում է, որ նորմալ երկրում Ազգային Ժողովը, կամ Պառլամենտը, կամ Սենատը վարչապետին դուրս չշպրտեր նման մոտեցման համար։ Ուղղակի բացառվում է, կարող եք հարցնել եվրոպացիներին, ամերիկացիներին։ Վերաձևակերպում եմ, չեմ խեղաթյուրում. պատասխանողի ներկայացուցիչն ասաց, սա դուք ճանաչելու եք, բայց ճանաչումը չի ենթադրում կատարում, մի հատ էլ կատարողական հայց կներկայացնեք, հետո կկատարենք։ Կրկնում եմ, եթե սա նման մոտեցումը ներկայացուցչի ինքնուրույն միտքն էր, ինքը պետք է ենթարկվի կարգապահական պատասխանատվության իր գործատուի կողմից, եթե ինքնուրույն չէր, ներկայացնում էր վստահորդի շահերը, ապա վստահորդը պետք է ենթարկվի քաղաքական պատասխանատվության»,- ասաց Օրբելյանը։

Օրբելյանը հույս հայտնեց, որ դատավարությունն այս գործով կարճ կտևի։ Նաև այդ պատճառով է, որ իր արձակուրդը հետաձգել է։

«Այս գործով հայցվորի ներկայացուցիչ ենք ես և պարոն Հովհաննիսյանը։ Գործընկերս վատառողջ լինելու պատճառով չի կարող նիստերին մասնակցել։ Մենք ամեն ինչ անում ենք, որ ամեն ինչ արագ լինի»,- ասաց նա։

Անդրադառնալով դատավոր Մհեր Պետրոսյանի նկատմամբ այդ գործով ճնշումների վերաբերյալ հրապարակումներին, լրագրողները հարցրեցին, հնարավո՞ր է այս միջնորդության բավարարման հետ կապված էլ ճնշումներ լինե՞ն, Օրբելյանն ասաց՝ շատ տխուր է, որ միջամտության փորձ է տեղի ունեցել, բայց շատ ուրախ է, որ դատավորը ԲԴԽ է դիմել, օգտագործել է առկա գործիքակազմը։

«Փորձեր, կարծում եմ, լինելու են։ Բայց քանի դեռ չկա արտաքին հիմնավորում այդ գործընթացի, ես չեմ կարող ենթադրությունների վրա հիմնվել։ Բայց որ վերջին շրջանում միջամտության փորձեր եղել են, հերքված չեն, փաստ է։ Տեսնենք, դրանք ինչ արձագանք կստանան։ Հուսով եմ, որ դատարանը կգործի որպես անկախ դատարան, կկայացնի անկաշկանդ որոշում»,- ասաց նա։