Ձեր վստահելի աղբյուրը

«2016-ի Ապրիլյան պատերազմում մեր հաղթանակը կասկածի տակ էին դնում այսօր իշխանության եկած մարդիկ, ովքեր խայտառակ կապիտուլյացիոն հայտարարությունից հետո կորցնելով Արցախի 75 տոկոսը՝ ասում են՝ մենք պարտված չենք»,- «Եռաբլուր» պանթեոնում լրագրողների հետ զրույցում ասաց ՀՅԴ ԳՄ ներկայացուցիչ Իշխան Սաղաթելյանը:

Նրա խոսքով, այս ամենը խոսում է այսօրվա իշխանության ղեկին հայտնված խմբակի աներեսության, ցինիկության աստիճանի մասին:

«2016 թվականի ապրիլին հստակ է՝ թշնամին լայնածավալ ռազամական  գործողություն սկսեց մի քանի ուղղություններով Արցախը գրավելու համար: Ի շնորհիվ հայկական բանակի, պաշտպանության բանակի, հերոս տղաների՝  կասեցվեց գրոհն ու ձախողվեց թշնամու հարձակումը, այսինքն թշնամին չհասավ իր նպատակին: Անշուշտ, ունեցանք զոհեր, փառք մեր հերոսներին, որոնց կյանքի գնով և գործունեությամբ կասեցվեց, տապալվեց, ձախողվեց  թշնամու ծրագիրը՝ թշնամուն պատճառելով տաս անգամ ավելի մեծ կորուստներ»,- ասաց Ի. Սաղաթելյանը:

Անդրադառնալով իշխանության ներկայացուցիչների՝ թուրքերի, ադրբեջանցիների հետ հնարավոր բարեկամության մասին հայտարարություններին,  նա նշեց. «Ամեն ինչ հստակ է:

Արցախը հանձնելուց հետո՝ հիմա  փորձում են կեղծ խաղաղասիրական լոզունգների ու հայտարարությունների տակ  մոռացության տալ այն ամենը, ինչ տեղի է  ունենում, ինչ որ տվել են, ուզում են մատնեն մոռացության, դրան զուգահեռ նաև Հայոց ցեղասպանության միջազգային ճանաչման փաստի ուրացումը և թուրքի հետ եղբայրություն անելը: Այսօրվա իշխանությունների քաղաքական գիծը դա է, որը փորձում են  հետևողականորեն իրականացել, որը մենք թույլ չենք տալու»:

Իշխան Սաղաթելյանն ասաց, որ եթե մինչև ընտրություններ չստացվի ազատվել այս չարիքի կառավարությունից, ընտրությունը լինելու է այն վերջին կետը, որի միջոցով պետք է ազատվել այս դավաճաններից:

«Եթե ՀՅԴ-ն որոշի մասնակցել այդ ընտրություններին, առաջնորդվելու է միայն այդ սկզբունքով՝ հեռացնել այս սրիկա դավաճաններին, փոխել երկրի քաղաքական կուրսը և փրկել հայրենիքը: Ինքն ամեն ինչ անելու է, որ վերարտադրվի, բայց շանս չի ունենալու, որովհետև վերջին հաշվով մեր ժողովրդի աչքի առջև է այս ամենը տեղի ունեցել: Ինչքան կարելի է խաբել, մոլորեցնել:

Իր հիմնական թեզը լինելու հետևյալը, որես խաղաղություն եմ բերելու: Իրենք փորձելու են իրենց ներկայացնել որպես խաղաղության ուժեր, իսկ հակառակորդներին՝ պատերազմի: Սա իրենց հայտնի թեզն է դեռ 1996-ից՝ պատերազմի և խաղաղության ուժեր: Բայց ակնհայտ է, որ մեր ժողովրդին կոտորել են և պատերազմի բերել են այդ «խաղաղասեր ուժերը»:

Խաղաղությունը չեն մուրում, պարտադրում են, իսկ դա կարող ես պարտադրել ուժեղ բանակով, հզոր պետությամբ, հզոր տնտեսությամբ: Իսկ այս մարդիկ լրիվ հակառակ ուղղության և ընթացքի մեջ են, հետևաբար մեր պահանջը շարունակում է  մնալ նույնը՝ սրանց պետք է հեռացնել հանուն Եռաբլուրի, հանուն այն տղաների, որոնք իրենց կյանքի գնով պահել են մեր հայրենիքը,  իրենց գործը պետք է շարունակել և այդ շարունակողներն իրենք չեն: Իրենք ամեն ինչ անելու են այս ամենը մոռացության տալու և թուրքերի հետ նոր էջ սկսելու համար»,- ասաց Իշխան Սաղաթելյանը: