Ձեր վստահելի աղբյուրը

Սա մեծ կորուստ է ոչ միայն իր ընտանիքի համար, այլ նաև հայ ժողովրդի համար։ Այս մասին այսօր՝ ապրիլի 2-ին, լեգենդար հրամանատար Արկադի Տեր-Թադևոսյանի հոգեհանգստի ժամանակ լրագրողների հետ զրույցում ասաց Պաշտպանության նախկին նախարար Սեյրան Օհանյանը:

«Հասկանալի է, կյանքի և բնության փիլիսոփայությունը՝  մարդ մեկ օր ծնվում, մեկ օր էլ նրա մարմինն անջատվում է հոգուց։ Կարծում եմ՝ Կոմանդոսի հոգին միշտ վառ է լինելու և  միշտ ջերմացնելու է մեր մատաղ սերնդին։ Նրա անցած  ճանապարհը, նվիրվածությունը հայրենիքին, վառ օրինակ պետք է հանդիսանա նաև ռազմական ուսուցման մեջ»,-ասաց Օհանյանը։

Պաշտպանության նախկին նախարարը կիսվեց՝ Արկադի Տեր-Թադևոսյանի հետ  ծանոթացել է  1990-ականներին, սակայն ավելի խորությամբ ճանաչել է  նրան Շուշիի օպերացիայից առաջ։

«Նա Շուշիի ազատագրման խորհուրդն է։ Նա ինձ հարազատ անձնավորություններից մեկն է»,-  ասաց Օհանյանը և անդրադարձավ  Շուշիի հայտնի օպերացիային։

«Կարծում եմ, որ Շուշիի ազատագրման օպերացիան այն ժամանակ իրականացվել է ռազմական արվեստի պահանջներին համաձայն. սկսած կազմակերպման հարցերից, տեղանքի ուսումնասիրում, հետախուզություն, ղեկավարում, փոխգործակցության կազմակերպում, համակողմանի ապահովման միջոցառումներ։ Սա է հանդիսացել առաջին այն գրավականը, որ հաղթանակ է բերել։ Հաղթանակի մյուս գրավականը մեր հրամանատարների և նրանց զինվորների, ենթակաների անձնուրացությունն է։ Այն ժամանակ մեր հրամանատարներն ու զինվորները կարողացան մագլցել այդ ժայռերն ի վեր և ազատագրել  հայոց հինավուրց Շուշի քաղաքը։ Հիմա ափսոսանք ենք մենք ապրում, շատ թերություններ  են եղել, նաև  շատ մութ կողմեր կան Շուշիի անկման հետ կապված, որոնք դեռ կպարզվեն»,-ասաց Սեյրան Օհանյանը։