Ձեր վստահելի աղբյուրը

Օրերս հայտնի դարձավ, որ  «Լիդիան Արմենիա» ՓԲԸ-ի կողմից Ամուլսարի ոսկեբեր քվարցիտների հանքավայրի շահագործման համար Վայոց ձորի մարզի Ջերմուկ համայնքի վարչական տարածքում արդյունաբերական նպատակով Արփա գետից 41,3 լ/վրկ ջրաքանակով ջրառ իրականացնելու համար շրջակա միջավայրի նախարարություն 2021թ. հունվարի 27-ի գրությամբ ներկայացված ջրօգտագործման թույլտվության ստացման հայտը մերժվել է շրջակա միջավայրի նախարարի 2021թ. մարտի 22-ի N86-Ա հրամանով։

Արփա գետից ջրօգտագործման հայտի երկրորդ մերժումն է, մեկ մերժում էլ եղել է Դարբ գետից ջրի օգտագործման համար։ Ընդանուր առմամբ ՝  «Լիդիան Արմենիա» ընկերությունը վերջին երեք տարվա ընթացքում  արդեն չորրորդ անգամ է դիմում ջրօգտագործման թույլտվություն ստանալու համար՝ երեք անգամ Արփա գետից և մեկ անգամ էլ Դարբ գետից։ Միայն մեկ անգամ՝ 2020թ-ին, ստացել է Արփա գետից 11լ/վ ծավալով ջրօգտագործման թույլտվություն: Մնացած դեպքերում ՝ մերժվել է։ Այս առիթով ընկերությունը նույնպես  հաղորդագրություն տարածեց ՝ տեղեկացնելով, որ   Ամուլսարի ծրագրի վերաբերյալ ՀՀ շրջակա միջավայրի նախարարության կողմից հերթական անօրինական որոշումն է կայացվել։ Միևնույն ժամանակ հայտնեցին, որ  օրենքով թույլատրելի բոլոր միջոցներով բողոքարկելու է ՀՀ շրջակա միջավայրի նախարարի հրամանը:

Նկատենք, որ  ընկերությունը ՀՀ վարչական դատարանի վարույթում  գտնվող ևս երեք հայց ունի ներկայացրած նախարարության դեմ ջրօգտագործման թույլտվության նախորդ հայտերի ապօրինի մերժումների հետ կապված:

Այսուհանդերձ, Panorama.am-ի հետ զրույցում   իրավաբան Նազելի Վարդանյանը, որի ձեռքի տակ կա Ամուլսարի շահագործման մասով այս պահին ընթացող  երկու դատական գործեր, ասաց, որ ՇՄ նախարարության ջրօգտագործման հայտի մերժումը պայմանավորված չէ նախարարի փոփոխությամբ։

«Մերժումը պայմանավորված է գետի էկոլոգիական վիճակով։ Արփայից թույլ չեն տվել, քանի  որ  ջրամբարի ստորին հատվածից պետք է վերցվեր, իսկ այդտեղ ջուրը սակավ է լինում։ Այսինքն՝ Արփա գետով շատ քիչ ջուր է գնում, մեծ մասը Արփա-Սևան թունելով գնում է Սևանա լիճ։  Բացի այն, որ ջրօգտագործման դեպքում կարող էին առաջանալ   էկոլոգիական խնդիրներ, հաշվի է առնվել նաև այն, որ  համայնքները ևս  օգտվում են գետի ջրից։  Հիմնք է ընդունել նաև որքան ծավալի ջուր կա գետում, հակտապես ամռան ամիսներին։ Այս ամենը հիմք ընդունելով նախարարությունը կամ թույլատրում է կամ ՝ոչ։ Հիմա այս դեպքում, մերժման պատճառը սակավաջրությունն է և այն, որ  գետից շատ համայնքներ են օգտվում։  Նույնը երկու տարի առաջ եղել է Դարբ գետի պարագայում»,-ասաց  Նազելի Վարդանյանը։

Նրա խոսքով ՝  «Լիդիան Արմենիա»  ընկերության իրավունքն է ՝  նորից դիմել դատարան և  բողոքարկել մերժումը։

«Եթե խոսքը գնում է  «Լիդիան Արմենիա»  ընկերության մասին, ապա հնարավոր չէ կանխատեսել  դատարանի գործերի ընթացքը»,- ասաց իրավաբանը։

Նազելի Վարդանյանը նաև տեղեկացրեց, որ այժմ Ամուլսարի մասով կա երկու դատական գործեր։

«Մեկը  ՀՀ Տարածքային կառավարման և ՀՀ  Շրջակա միջավայրի նախարարության դեմ է ՝ հանքարդյունահանման թույլտվությունները անվավեր ճանաչելու մասով։ Այս դատական գործը ձգվում է արդեն վեց տարի։ Մյուս դատական գործը նոր երևան եկած հանգամանքներով փորձաքաննական  եզարկացությունն ուժը կորցրած ճանաչելու մասով է։ Այս գործն ընդդեմ նախարարի է։ Գործը գնում է 2018 թվականից  սկսած։ Թեև  նախկին նախարար Էրիկ Գրիգորյանի դեմ է, բայց հիմա էլ գործը  շարունակվում է, անկախ նրանից թե ով է նախարարը։ երկու գործերի ավարտը դեռ պարզ չէ»,-ընդգծեց իրավաբանը։

Մյուս կողմից էլ հարկ է նկատել, որ  «Լիդիան Արմենիան» դատարան դիմելու բավական հարուստ փորձ ունի՝ վարչական ակտերը անվավեր ճանաչելու մասով և այլն։