Ձեր վստահելի աղբյուրը

«Հայ Ձմեռ պապ» բարեգործական հիմնադրամը սկսել է «Հարգանքի և երախտիքի կրթամրցանակ՝  նվիրված մեր գոյամարտի հերոսների հիշատակին» գիտակրթական ծրագիրը: Panorama.am-ը ծրագրի վերաբերյալ զրուցել է «Հայ Ձմեռ պապ» բարեգործական հիմնադրամի տնօրեն Արմինե Պետրոսյանի հետ։

Panorama.am-Տիկին Արմինե, ո՞րն է ծրագրի հիմնական նպատակը:

Ա. Պետրոսյան- Կես տարի է անցել կործանարար պատերազմից։ Մեր երկիրն ապրում է ծանր օրեր, ընդարմացումն ու ցավը գնալով սաստկանում են։ Մեջքը շտկելու, պարտության պատճառներն իմաստավորելու և կորցրածը հետ բերելու, զոհվածների խնկելի կերպարնները պատվով հիշատակելու, վիրավորների ապագայի մասին հոգալու, հետպատերազմյան կյանքը կարգավորելու, նոր հաղթանակներ նախանշելու և դրանց հասնելու ճանապարհներ բացելու կամք ու հնարավորություններ են պետք։

Կրթությունն ու գիտությունն են այն հիմնարար հենասյուները, որոնց վրա պետք է կառուցվի Հայաստանի առաջընթացի շենքը։ Այդ շենքը կկառուցվի անպայմա՛ն։ Դրան է ուղղված «Հայ Ձմեռ պապ» բարեգործական հիմնադրամի նոր՝ «Հարգանքի և երախտիքի կրթամրցանակ՝ նվիրված մեր գոյամարտի հերոսների հիշատակին» գիտակրթական նախագիծը, որի նպատակն է

• հնչեցնել Հայրենիքի պաշտպանության համար իրենց կյանքը զոհաբերած հերոսների անունները, ներկայացնել նրանց սխրանքը,
• այդ նպատակն իրականացնել՝ խրախուսելով գիտակրթական հաստատություններում սովորող օժտված երիտասարդներին,
• վերահաստատել մեր ժողովրդի համար ավանդաբար ազգային արժեք համարվող կրթության և գիտության զարգացման կարևորության գիտակցումը՝ կապելով այն նվիրյալների հերոսացման օրինակների հետ,
• կամուրջ ստեղծել պատերազմի հերոսների ընտանիքների և առաջադեմ ուսանողների միջև, պարբերական փոխայցեր և այլ միջոցառումներ կազմակերպել,
• նպաստել «Հարգանքի և երախտիքի կրթամրցանակի» մոդելի ձևավորմանը և գաղափարի տարածմանը,
• պատկան մարմինների, բարեգործական կազմակերպությունների/անձանց ուշադրությունը վերստին ուղղորդել դեպի զարգացման ծրագրեր և գիտահեն տնտեսություն կառուցելուն միտված ներդրումներ։

Panorama.am -Ինչո՞ւ որոշեցիք հանդես գալ նման նախաձեռնությամբ:

Ա.Պետրոսյան-Կրթական և մշակութային ծրագրերը «Հայ Ձմեռ պապի» գործունեության կարևորած ուղղություններից են։ Արդեն մի քանի տարի է, ինչ Հայաստանի տարբեր մարզերի հեռավոր, հիմնականում՝ սահմանամերձ համայնքներում գործում են «Հավեսին սենյակներ», որոնց նպատակը գյուղաբնակ երեխաներին կրթամշակութային պատշաճ հնարավորություններ առաջարկելն է։ Մենք երազում ենք երեխաներին «մայրաքաղաքային» մշակութային պայմաններին հավասարեցված կրթական պայմաններ ու միջավայր տրամադրելու, ճաշակ ձևավորելու ու գիտահեն կրթական միջավայր ստեղծելու մասին։

44-օրյա պատերազմն անողոք հարված հասցրեց մեր նախագծերին․ կորցրեցինք մեր ծրագրերի մասնակից շնորհաշատ երիտասարդներից երկուսին՝ Էրիկը զոհվեց, Գևորգն անհետ կորած է։ Հայաստանն ունի բազմահազար զոհեր՝ լուսավոր, խելացի, գեղեցիկ, նվիրյալ, թանկ, ուսյալ երիտասարդներ։ Մեզ մնաց նրանց ընդհատված կյանքի ուղու, կիսատ մնացած ուսման ու գործի, չիրականացած երազանքների ու նպատակների կսկիծը։

Կորստի, դավաճանության, անարդարության, սուգի ծանր շրջան է, բայց միայն այս մտքերով ապրելը և ելքեր չփնտրելը կնշանակի շարունակել քայլել մեզ պարտադրված պարտության ճանապարհով։
Մենք պարտք ենք այս անգին երիտասարդներին․ պետք է ոչ միայն շարունակել նրանց կիսատ թողածը, այլև մեր կյանքում պահպանել ու փայփայել նրանց նվիրական ներկայությունն ու պայծառ կերպարները, առաջընթացի ու զարգացման իրական ուղիներ նախանշել՝ հնչեցնելով նրանց թանկ անունները։

Ըստ մեզ՝ այսօր առավել, քան երբևէ, անհրաժեշտ է ներդրում կատարել կրթության և գիտության զարգացման մեջ, հող ստեղծել երիտասարդ գիտնականների և գյուտարարների նոր սերնդի ձևավորման համար։ Հիմնադրամի ներդրումն այդ առումով կլինի մեր գոյամարտի հերոսների հիշատակին նվիրված հարգանքի և երախտիքի կրթական մրցանակի սահմանումը, մեխանիզմը գործարկելն ու առաջարկվող մոդելի տարածումը։

Panorama.am-Ովքե՞ր կարող են դառնալ մրցանակակիրներ: Ծրագրի մեկնարկը տալիս եք «Էրիկ Գևորգյանի անվան երախտիքի կրթամրցանակ»-ով: Ինչո՞ւ հենց նա ընտրվեց: Էլ ո՞ւմ անվան մրցանակներ կլինեն:

Ա.Պետրոսյան-Էրիկը պատերազմ էր մեկնել ԵՊՀ ֆիզիկայի ֆակուլտետում ուսումն ավարտելուց հետո և իր գիտելիքներն իրացրել որպես թնդանոթահրետանային մարտկոցի կառավարման դասակի հրամանատար։ Նա զոհվեց մարտական առաջադրանքը կատարելիս՝ հերոսաբար փրկելով իր ղեկավարած դասակի զինվորների կյանքը։ Էրիկ Գևորգյանի՝ բազմաշնորհ երիտասարդի, աներկբա լիդերի, անձնվեր քաղաքացու և սիրված մարդու մասին պատմող նյութերը զետեղված են «Հայ Ձմեռ պապ» բարեգործական հիմնադրամի՝ իր իսկ ձեռամբ կառուցված կայքում՝ հիմնադրամի ուսանող-կամավորների ձեռամբ բացված և նրա պայծառ հիշատակին հետմահու նվիրված բաժնում։

Էրիկի կարճատև, բայց հերոսական կյանքի պատմությունն արժանի է միշտ հիշվելու և կողմնորոշիչ օրինակ ծառայելու երիտասարդներին։ Նրա անունով կրթամրցանակ ստեղծելու առաջարկը քննարկվել և համաձայնեցվել է Էրիկի երախտաշատ ծնողների, մրցանակի հիմնադիր բարերարներ, բեռլինաբնակ Մորիյո-Վիկտորյա-Զեյթունյան ընտանիքի, ընկերների և ուսուցիչների հետ, ապա նամակով ներկայացվել ԵՊՀ ֆիզիկայի ֆակուլտետի դեկան Ռաֆիկ Հակոբյանին։

Նախագիծը ներկայացնելու հաջորդ քայլն եղավ պարոն Հակոբյանի հրավերը և հանդիպումը Էրիկի ուսանած ֆակուլտետի դեկանատում։ Ֆիզֆակի ղեկավարության ջերմ արձագանքն ու կառուցողական առաջարկներն ավելացրեցին մեր հաստատակամությունն ու համոզումը, որ առաջարկվող ծրագիրն արժեքավոր և հեռանկարային է։ Հետաքրքրությամբ տեղեկացանք, որ ֆակուլտետն ակտիվ աշխատանքներ է տանում այսօրվա գործող կրթակարգը մեր երկրում հաստատված դժվար մարտահրավերներին արձագանքող և առաջանցիկ դարձնելու, նոր մասնագիտություններ ստեղծելու և այլ գիտակրթական նախաձեռնությունների ուղղությամբ։

Հանդիպման արդյունքում որոշակիացվեց «Հայ Ձմեռ պապ» բարեգործական հիմնադրամի և ԵՊՀ ֆիզիկայի ֆակուլտետի գործընկերային համաձայնությունը. յուրաքանչյուր կիսամյակ հիմնադրամի 200․000 (երկու հարյուր հազար) դրամի չափով սահմանած մրցանակը կշնորհվի ֆակուլտետի այն ուսանողին/մագիստրոսին/ասպիրանտին, որի տվյալները կհամապատասխանեն հետևյալ չափորոշիչներին (բոլորին կամ գերակշիռ մասին)․

• առաջադիմություն,
• գիտական նորարարություն,
• պատերազմին մասնակցած լինելու և կրթությունը ֆիզիկայի ֆակուլտետում շարունակելու հանգամանք,
• քաղաքացիական հանձնառություն,
• այլ։

Ուսանողի/մագիստրոսի/ասպիրանտի ընտրության անաչառությունն ապահովելու նպատակով որոշվեց «Էրիկ Գևորգյանի անվան երախտիքի կրթամրցանակի» շահառու ուսանողի ընտրությունն իրականացնել ֆակուլտետի դեկանի և դասախոսների, գիտության և կրթության զարգացման գործում ճանաչված մասնագետների, Էրիկի ծնողների և բարերարների ընդհանուր համաձայնությամբ։ Ֆակուլտետն արդեն ներկայացրել է արժանավոր թեկնածուների ցանկ, որից հանձնաժողովը կընտրի այս կիսամյակի մրցանակակիր երիտասարդին։ Այս կարգով՝ կիսամյակը մեկ, հետագայում կընտրվեն նաև այլ շնորհառու երիտասարդ ֆիզիկոսներ։

Panorama.am-Հիմնադրամն արդեն ունի՞ բարերարներ, ովքեր կտրամադրեն կրթամրցանակ։

Ա.Պետրոսյան-Էրիկ Գևորգյանի հիշատակին նվիրված կրթամրցանակի գաղափարը ձևավորվեց Էրիկի զոհվելու ցավի և նրա լույս հիշատակը պահպանելու նախնական մղումով։ «Հայ Ձմեռ պապ» բարեգործական հիմնադրամի կայքի ծրագրավորման աշխատանքներին Էրիկի հետ մասնակցած, գերմանաբնակ Մորիյո-Վիկտորիա-Զեյթունյան ընտանիքը ստանձնեց կոնկրետ այս մրցանակի ֆինանսավորման հանձնառությունը։

«Հայ Ձմեռ պապը» լիահույս է, որ գործընկերների և բարերարների օժանդակությամբ կկարողանա նման կրթամրցանակներ սահմանել Արցախյան գոյամարտի այլ հերոսների անուններով ևս։ Այդ նպատակով ներդրում կարելի է անել հիմնադրամի հաշվի համարով՝ նշելով «երախտիքի կրթամրցանակ» բառերը։

«Հայ Ձմեռ պապ» բարեգործական հիմնադրամ
«Կոնվերս բանկ» ՓԲԸ, հ/հ  19300 66890980100

Հիմնադրամը կլուսաբանի Արցախյան պատերազմի հերոսների պատմությունները, կզբաղվի նրանց անուններով կրթամրցանակներ սահմանելու գաղափարի ջատագովությամբ։ Նրանք՝ մեր զոհված թանկերը, ոսկի սերմեր են, որոնք վերածնվելու են այն մասնագետների մեջ, ովքեր կերտելու են ապագայի երջանիկ, միասնական ու հաղթող Հայաստանը։ Նրանք զոհվել են ոչ թե «հանուն ոչնչի», ինչպես ջանք է թափում ներկայացնել այսօր տարվող ապազգային քարոզը, այլ հանուն Հայաստանի զարգացած, գիտահեն, մրցունակ, արժանապատիվ պետության։

«Հայ Ձմեռ պապը» հանձն է առնում ներկայացնել նաև մրցանակակիր այն երիտասարդների գիտական հետագիծը, որոնք բարերարների օժանդակությամբ նոր լիցք ստացած՝ կբազմապատկեն իրենց ջանքերը ֆիզիկայի, հետագայում էլ՝ հնարավոր ֆոնդահայթայթման դեպքում, գիտության այլ ճյուղերում ևս։ Միգուցե հենց նրանք՝ այդ երիտասարդներն են ձևավորելու գիտնականների սպասված նորարար դասը, որի աշխատանքով Հայաստանը բացելու է անվտանգ, պաշտպանված ու պատվարժան ապագայի դուռը։

Կարծում ենք, որ այս նախաձեռնությունը մի կարևոր քար կավելացնի Էրիկի և նրա նման հազարավոր հերոս նահատակների երազած պետության կիսատ թողած շինարարության ընթացքին։
Մենք նրանց  Հայրենիք ենք պարտք։

Panorama.am-Շնորհակալություն հարցազրույցի համար։