Ձեր վստահելի աղբյուրը

«Անսպասելի չէ Ադրբեջանի կողմից հայկական եկեղեցիների պղծումը։ Այդ առումով մենք նոր չէ, որ պետք է ծանոթանանք Ադրբեջանի պետական քաղաքականությանը։ Նախիջևանի խաչքարերի ոչնչացումը դրա ցայտուն օրինակներից է»,- «Եռաբլուր» զինվորական պանթեոնում լրագրողների հետ զրույցում ասաց Տեր Արշակ եպիսկոպոս Խաչատրյանը։

Նա նշեց, որ Մայր Աթոռը փորձում է միջազային տարբեր կազմակերպությունների ներգրավելու միջոցով որոշակի անվտանգության երաշխիքներ ստանալ պատմամշակութային  հուշարձանների պահպանության համար, բայց որքան է արդյունավետ, դժվար է գնահատել։

«Մեծապես վտանգված են մեր սրբավայրերը, պատմամշակութային հուշարձանները՝ հաշվի առնելով Ադրբեջանի  պետական քաղաքականության հիմքում դրված ընդհանուր մոտեցումները»,- ասաց Տեր Արշակը։

Արշակ եպիսկոպոս Խաչատրյանը նշեց, որ որոշակի ազգային հոգեբանական կոմպլեքսի հետևանք է, երբ փորձում են ամեն կերպ հայկական պատմական տարածքները սեփական հռչակել.

«Պետք է փորձել պատմամշակութային այն շերտը, որ ենթադրում է հայկակականություն, ոչնչացնել, ներկայացնել դրանք թուրքական կամ իսլամական, որքան էլ պետականորեն, գիտականորեն զավեշտական թվա։ Այդ հոգեբանության և այդ հոգեբանության վրա կառուցված քաղաքականության հետևանք է»։