Ձեր վստահելի աղբյուրը

Հայաստանում կենսաբազմազանության վրա կլիմայական փոփոխությունների հնարավոր ազդեցության վերաբերյալ որևէ լուրջ ուսումնասիրություն չի արվել, բայց հստակ է, որ հանգեցնում են թռչունի այս կամ այն տեսակի վերաբնակեցմանը, միգրացիային: Panorama.am-ի հետ զրույցում ասաց «Թռչունների կենտրոն» ՀԿ նախագահ, բնապահպան Սիլվա Ադամյանը:

Նա նշեց, որ Հայաստանում գիտության ոլորտը բավականին վատ վիճակում է, գիտական ստրուկտուրան հին ձևերով է աշխատում, ինչն արդյունավետ չէ:

«Գիտությունը հետընթաց է ապրում մեզ մոտ, ինչը շատ վատ է անդրադառնում մեր շրջակա միջավայրի, կենսաբազմազանության ուսումնասիրության վրա: Իսկ  որ կլիմայական փոփոխությունների հետ կապված պետք է արվեն գիտական հետազոտություններ, միանշանակ է»,- նշեց բնապահպանը:

Ս. Ադամյանը համամիտ չէ որոշ գիտնականների այն պնդումներին, որ  Հայաստանի վրա կլիմայական փոփոխություններն այդքան չեն ազդում: Նա հիշեցրեց մի տարի Սևանա լճի սառցակալումը, ինչը թռչունների հետ կապված խնդիր էր առաջացել, կամ՝ տաք ու առանց տեղումների եղանակները նույնպես խնդիրներ են առաջացնում:

«Դա ցուցիչ է, որ կլիմայական փոփոխությունները լուրջ ազդեցություն ունենում են կենսաբազմազանության վրա: Այլ տեղերում էլ ունենում ենք խնդիրներ: Օրինակ, Խոսրովի արգելոցում եղան հրդեհներ, վերագրեցին անփութությանը, բայց իրականում այդքան էլ այդպես չէ, կլիմայական փոփոխությունների հետ կապված լուրջ խնդիրներ կան, սրա վրա էլ պետք է աշխատել»,- ասաց բնապահպանը:

Ինչ վերաբերում է կլիմայական փոփոխությունների պատճառով թռչունների չուին ու վերադարձին, Սիլվա Ադամյանն ասաց, որ դեռևս որևէ անոմալ երևույթներ չեն արձանագրել: Այս տարի ևս, ըստ նրա, կտրուկ փոփոխություններ չեն նկատվել:

«Ճիշտ է, մարտը մի քիչ ավելի ցրտոտ էր, բայց ոչ այն աստիճանի, որպեսզի անոմալ երևույթ նկատվեր և թռչունների չուն, վերադարձը հետաձգվեր:

Աշխարհի մակարդակով, ընդհանուր առմամբ, վերադարձը գրանցվում է մարտի վերջին, բայց մեզ մոտ ավելի շուտ է լինում՝ փետրվարի վերջին: Տարիների ընթացքը ցույց է տալիս, որ մեզ մոտ չուն ավելի արագացել է: Մենք ունենք ավելի տաք ձմեռներ, գարուններ, դրա հետևանքով շատ թռչուններ փետրվարի վերջին են վերադառնում, թռչուններ կան՝ մարտի կեսերից»,- ասաց Ադամյանը:

Նա նշեց, որ կլիմայի փոփոխությունը, ջերմաստիճանի տաքացումն ազդում է կենդանական աշխարհի տեղաշարժի, նրանց բնակավայրերի փոփոխման, միգրացիայի վրա:

«Դա մեզ մոտ արտահայտվել է արագիլների՝ այլ երկրներ չգնալով: Օրինակ, սպիտակ արագիլները տարիներ շարունակ չեն չվում: Հայաստանում դեռևս լուրջ հետազոտություն չեն արվել այս ուղղությամբ, որպեսզի հասկանանք՝ միգուցե կան այլ տեսակներ էլ, որոնց չուն դադարել է կամ շուտ են վերադառնում»,- ասաց նա:

Սիլվա Ադամյանը նաև նշեց, որ վերջերս իրեն մի նյութ էին ուղարկել, ըստ որի, Ադրբեջանը սկսել է որսալ մոխրագույն արագիլ, որը Կամիր գրքում է գրանցված. 

«Նկարագրված տարածքները ոնց որ մեզ հետ սահմանակից են: Արտասահմանցիներն էին ահազանգել, մեզ մոտ դեռ որևէ մեկը դրանից տեղյակ չէ, թվեր չունենք»: