Ձեր վստահելի աղբյուրը

«Նոր ինձ մի մեծահասակ մարդ մոտեցավ, հարցրեց՝ էս ինչ արեցիք էս երկրի հետ, ասաց, որ այս շենքերը, որ տեսնում ենք, բոլորը կոմունիստների ժամանակ են կառուցվել, մարդիկ աշխատում էին, ապրում»,- այսօր Սևանում անցկացվող «Հայրենիքի փրկության շարժան» հանրահավաքի ընթացքում ասաց շարժման վարչապետի թեկնածու Վազգեն Մանուկյանը։

Նա նշեց, որ երկու տարի առաջ այդ մարդուն կպատասխաներ, որ իսկապես շատ թերություն կա երկրի ներսում, իսկապես «զոռբաներն» են առաջ գնացել երկրում, բայց Հայաստանը նաև հաղթանակներ է ունեցել։

«Աշխարհի 5000 ժողովուրդ ուզում են անկախ պետություն ունենալ, իսկ գոյություն ունի միայն 200 անկախ պետություն, որոնցից մեկը մենք ենք։ Մենք կառուցեցինք մի բանակ, որ ամենամարտունակն է Անդրկովկասում, մենք կարողացանք հետ վերցնել մեր հայրենիքի այն մասը, որ կոչվում է Արցախ։ Եվ հրապտությամբ դա կասեի։ Իսկ այս 44 օրից հետո ես պատասխան չունեմ»,- ասաց Վազգեն Մանուկյանը։

Նրա խոսքով, այն, ինչ կատարվել է 44 օրվա ընթացքում, պատերազմ չէր. հայ ժողովուրդը պատերազմ տեսել է 1992-94 թվականներին, երբեմն պարտվել ու նահանջել է, ապա հաղթել ու առաջ է գնացել, կորցրել է ու վերցրել։

«Ամբողջ ժողովուրդը մասնակից էր այդ գործընթացներին, գիտեր՝ զորքը որտեղ է կանգնած, երբեմն հանրահավաքներ էինք անում, պարտադրում էինք իշխանություններին՝ այս կամ այն որոշումն ընդունել, փոխում էինք պաշտպանության նախարարին։ Բայց այս 44 օրը պատերազմ չէր, սպանդանոց էր։ Փակված էին բոլոր լրատվամիջոցները, ոչ մի ինֆորմացիա չուներ ժողովուրդը, և իրենք իրար հետևից 1000-ավոր երիտասարդների գցում էին կրակի տակ։ Ու մենք մտածում էինք, թե հաղթում ենք։ Հազարներով գնացին ու կոտորվեցին, և ինչ, դա մենք ներելո՞ւ ենք»,- հարց հնչեցրեց նա։

Ըստ Վազգեն Մանուկյանի, սա ոչ թե վատ իշխանություն է, որը պետք է փոխել ընտրությունների միջոցով, այլ մարդկանց սիրտը պետք է ատելությամբ լցվի դրա նկատմամբ. «Իրենք մեր հայրենիքը ոչնչացրին և շարունակում են ոչնչացնել։ Եվ միակ ճանապարհն է ժողովրդով միասին սրանց քշելը»։

Նա հայտնեց, որ չի ընդունում ընտրություններ անցկացնելը, քանի որ ընտրությունները լինում են  վատ իշխանություններին փորձվածներով փոխարինելու համար, իսկ առաջիկա անցկացվելիք ընտրությունները, ըստ Վազգեն Մանուկյանի, ընտրություն չեն։

«Մենք ապագա սերունդներին պետք է ապացուցենք՝ այն մարդիկ ենք, որ չեն ներում դավաճանություն, չեն ներում իրենց հետ կատարված նենգությունը։ Դա պետք է կատարի մեր ամբողջ ժողովուրդը, դրանից հետո մենք կզգանք, որ վերականգնում ենք մեր արժանապատվությունը։ Որովհետև մեր կորցրածը միայն մարդիկ ու տարածքները չեն. մենք ամբողջ աշխարհում նվաստացած վիճակում ենք, արհամարհանքով են վերաբերում հայ անունին»,- շեշտեց Վազգեն Մանուկյանը։

Ըստ նրա, ոչ թե ընտրություններով, այլ զոռով պետք է «քշել» այս իշխանություններին, ու որքան զոռով դա արվի, այդքան կհարգեն հայերին։

«Հիմա էլ ասում են՝ ճանապարհներ են բացվել։ Այսինքն՝ դուք ի՞նչ, պատերազմում դիտմամբ պարտվեցիք, 1000-ավոր զոհեր տվեցիք, որ ճանապարհ բացե՞ք։ Այդպես է ստացվում, որ պատերազմը գնացին, պարտվեցինք, որ ճանապարհներ բացվեն։  Ու այդ ճանապարհներից 2-3 զոռբա նորից հարստանալու են, ամբողջ գյուղատնտեսությունը ոչնչանալու է, նորից Հայաստանը քոչելու է։ Եթե դուք մտածում եք, որ սրանից հետո ոչինչ, վերջացավ, ու լավ եք ապրելու, չէ, լավ չեք ապրելու, շատ վատ եք ապրելու»,- կարծիք հայտնեց նա։

Ներկայացնելով շարժման քայլերի հերթականությունը՝ Վազգեն Մանուկյանն ասաց, որ առաջին քայլը ներկա իշխանություններին դուրս շպրտելն է։

«Դա պետք է անենք ամբողջ ժողովրդով։ Մենք գտնում ենք, որ ներկա իշխանությունը պետք է վռնդվի դուրս, ապա պետք է ստեղծվի ժամանակավոր կառավարություն, որի ընթացքում կհանդարտվի երկիրը, մենք կտեսնենք՝ ինչ ճանապարհով ենք գնալու, կվերականգնվեն որոշ բաներ և հետո արդեն ընտրություն կլինի, ժողովուրդը կորոշի՝ ում հետևից է գնում։ Ներկա ընտրությունները բացի գլխացավանքից, բացի վնասակարությունից ոչ մի բան Հայաստանին չեն բերելու»,- եզրափակեց խոսքը Վազգեն Մանուկյանը։