Ձեր վստահելի աղբյուրը

«Երկիրը լքող քաղաքացիներին կոչ ենք անում գալ, կանգնել մեր կողքին, մեր պետության կողքին, միասնաբար քշենք այս դավաճաններին ու կառուցենք մեր երազած հայրենիքը»,- Սևան քաղաքում կազմակերպված հանրահավաքում հայտարարեց «Հայրենիքի փրկության շարժման» համակարգող Իշխան Սաղաթելյանը:

Նրա խոսքով՝ իշխանական թիմը խաբել է ժողովրդին, բարեկեցիկ կյանք խոստացել, սակայն խոստումներից 3 տարի անց երևում է միայն կորսված հայրենիք, 5000-ից ավելի զոհ, փլուզված տնտեսություն: 

«Ես խոստանում եմ՝ իմքայլական պատգամավորները ձեզնից ներողություն են խնդրելու, որովհետև նրանք եկան, ձեզնից 15-20 հազար ձայն հավաքեցին, հայտնվեցին խորհրդարանում, մաս կազմեցին այս դավաճանական պրոցեսին ու մինչև հիմա ձեզնից ներողություն չեն խնդրել»,- հայտարարեց Սաղաթելյանը:

Նա նկատեց, որ պատերազմի ժամանակ Գեղարքունիքի մարզը թշնամու հետ ուներ 82 կմ սահման, իսկ պատերազմից հետո այդ սահմանը դարձել է 160 կմ և ներկայում այդ սահմանը պահելու համար անհրաժեշտ է հսկայական ենթակառուցվածքներ ու ռեսուրսներ:

«Պատերազմից հետո Հայաստանում կա 7000 տեղահանված ընտանիք՝ շուրջ 30 հազար մարդ, ունենք բազմաթիվ անվտանգային խնդիրներ: Այս իշխանությունն ի վիճակի չէ պաշտպանելու մեր ժողովրդի շահերը, իրավունքները, զարգացնել տնտեսությունը, նա պետք է րոպե առաջ հեռանա՝ հանուն հայ ժողովրդի, Արցախի, մեր ապագայի: Մենք չենք կարող անտարբեր նստել մեր տները ու նայել, թե ինչպես է օր-օրի կործանվում մեր երկիրը»,- հայտարարեց ՀՅԴ ներկայացուցիչը:

Վերջինս նշեց, որ երեք տարի շարունակ իշխանութունը խոստացել էր միլիոնների ներդրում, ճոպանուղի, ճեմուղի, որ Գեղարքունիքի մարզում բարելավելու է կյանքը, սակայն ոչ մի խոստացված ներդրում չի իրականացվել, իսկ առաջիկայում էլ Մարտակերտ-Վարդենիս ճանապարհի չգործելու և Սոթքի ոսկու հանքի փակման պատճառով սոցիալական վիճակն էլ ավելի է վատանալու: